Gisugo paningil, nanapog, priso

MANILA, Philippines —  Usa ka lalaki nga nag-viral sa social media video nga nanapog og drayber sa habalhabal ang gidakop  ug gibalhog sa prisohan sa kapolisan sa Lungsod sa San Fernando.

Ang pagpanapog gikatahong nahitabo niadto Disyembre 26, diha sa Barangay Sangat, Lungsod sa San Fernando.

Ang dinakpan mao si alyas Hutch, 43 anyos, heat ventilation air-conditioning helper, residente ra sab sa maong barangay.

Samtang ang gidagmalan niini mao si alyas Mark, 30, habal-habal driver ug taga Barangay Greenhills sa maong lungsod.  Sa impormasyon sa San Fernando Municipal Police Station ang biktima ni-report sa police labot sa maong insidente.

Gihimo nga interview , nasuta nga alas 6:40 sa buntag niadtong December 26, 2025 ang biktima nagmaneho sa iyahang motorsiklo kuyog ang live-in partner ug anak niini paingon unta mobayad sa ilang gikautangan.

Apan una pa sila makaabot didto, nasugatan na nila ang suspek nga matud pa nangangkong maoy gisugo sa tawong ilang gikautangan aron maoy maningil sa utang.

Nakuratan matud pa ang biktima taras sa suspek kay agresibo kaayo ug nagsige og babag sa iyang agianan.

Ug sa kalit lang, diretso siyang gisagpa niini sa nawong hinungdan sa pagkalabhag sa iyang aping, gikataho nga gihulga sab niini ang ilang kinabuhi mao nga nagdali sila sa pagbiya sa lugar ug nidangop sila sa kapolisan.

Daling gipangita sa kapulisan ang suspek apan nitago kini ug wala na makita. Nianang pagka alas -8 sa gabii sa samang adlaw boluntaryong kining ni-surrender sa police station.

Sa pag-abot sa biktima ug mga saksi positibo nilang giila ang suspek nga maoy nanghasol ug nanagmal sa biktima.