Top 4 Most Wanted nadakpan

CEBU, Philippines —  Nasikop sa kapolisan sa Danao Police Station ang usa ka 66 anyos nga Top 7 nga Most Wanted Person sa Provincial Level ug Top 4 sa Municipal Level.

Ang mga sakop sa Intelligence Section sa Danao Police Station nga ubos sa kamandoan sa ilang hepe nga si Police Lieutenant Colonel Hendrix Bancoleta nasikop si alyas Dodoy nga lumad nga taga Siyudad sa Toledo apan nisibat kini sa maong dapit ug didto magpuyo sa Barangag Simbacan sa bukirang bahin sa Siyudad sa Danao. Ang maong dinakpan ang nag-atubang og kaso nga 3 counts of Act of Lasciviousness ug nalutsan kini og Warrant of Arrest nga giluwatan ni Judge Judilyn Hugo  Tapia-Menchavez  sa Regional Trial Court  Branch 8 Siyudad sa Sugbo.

Sa nasayran nga human  sa pagluwat og Warrant of Arrest kalit nga nawagtang sa ilang dapit sa Toledo City ang suspetsado.

Apan niadtong miaging pagsaulog sa Pasko adunay nakasigpat kaniya sa Barangay Simbacan ug maoy nitaho sa kapolisan hinungdan sa iyang pagkasikop.

Ang korte adunay girekomendar nga piyansa nga P180,000 sa matag kaso nga giatubang niini alang sa iyang temporaryong kagawasan. (BANAT NEWS)