Konsehal Alcover gikiha’g cyber libel

CEBU, Philippines — Nag-atubang karon og 12 ka kasong cyber libel si Cebu City Councilor Pastor “Jun” Alcover Jr. human siya gipasakaan og kaso  ni Ibrahim Mark Dianalan Jr. kabahin sa giingong malisyosong mga komento sa pagpadagan sa Colon Night Market sa Dakbayan sa Sugbo.

Si Dianalan ang gitudlo nga organizer ug operator sa Colon Night Market pinaagi sa Participative Association of Sugbo Vendors Incorporated nga kusganong gisupak ni Alcover.

Daghang mga rason si Alcover nganong dako siyang supak , una niini wala kini niagi sa Garbo Asenso Sumbanan Alyansa sa Gugma board.

Dunay daghang reklamo sa mga stall vendors nga mahal ang renta, walay nakwarta ang syudad gikan sa renta nga gikolekta matag buwan, mas gihatagan og prayoridad nga makapaninda ang mga dili residente sa syudad,  ug adunay mga dalan nga napasirad-an nga wala untay labot sa pagpahigayon sa night market.

Ang konsehal wala magmakuli sa pagpadayag sa iyang mga komento sa iyang personal nga Facebook page kabahin sa gihulagway niyang ilegal nga pagpadagan sa night market.

Matud pa sa konsehal ang iyang gibasehan mao ang kung unsay nalatid sa polisiya ug wala kini bulok politika.

“Kung makita namo nga dili maayo, among supakon. Mao man sad na ang papel sa fiscalizer,” suma pa in Alcover.

Una nang giingon sa konsehal nga dili siya supak sa pagpahigayon sa night market apan karon nga wala kini niagi sa tukmang proseso, maingon nga kadudahan ug adunay nagpaluyo nga sindikato.

Apan ang tanang pasangil ni Alcover gilakip sa kaso nga gipasaka ni Dianalan sa Marawi City, Lanao del Sur.

Si Dianalan nagnakanayon nga gihugaw-hugawan sa konsehal ang iyang pangalan isip negosyante tungod sa walo ka Facebook posts sa konsehal niadtong Septiyembre hangtud Oktubre 2025.

Dugang pa, dili sab makadawat si Dianalan nga gitawag siya og buaya ug lakip sa sindikato.

Giklaro ni Dianalan niagi kini sa tukmang proseso aron nga makapahigayon sa night market sama sa pagkuha og special permit gikan sa Business Permit and Licensing Office ug official authorization gikan sa konseho pinaagi sa Resolution 17-0588-2025.

“The posts are not only false but also malicious. It is impossible that I was unaware of the City Council’s approval, since I was present and actively participated in the session that authorized the night market’s operations,” suma pa ni Dianalan.

Sa bahin ni Alcover, ang gipasaka nga mga kaso ni Dianalan batok kaniya adunay bulok politika ug gihulagway sa konsehal nga paagi kini sa nagpaluyo kang Dianalan nga pahilumon ang mga nisupak sa night market.

 Usa sa gitumbok ni Alcover nga nagpaluyo kang Dianalan si Mayor Nestor Archival.

“Disturbing kaayo ang nahitabo karon sa City Hall. Disturbing in the sense nga Pasko pero nakawadat mi og kaso,” si Alcover niingon.

Apan wala mahadlok si Alcover sa mga gipasaka nga kaso gumikan kay kahibalo ang konsehal nga makatarungan ang iyang gibuhat alang sa mga Sugbuanon kay kung magpadayon ang mga ilegal nga kalihukan sa syudad, ang mga Sugbuanon ra sab ang maalaut.

Buot ug tuyo sab nga giisa ni Alcover ang mga dili makiangayon nga pamalakad sa night market aron nga matul-id ang mga hiwi nga pamaagi sa gobyerno sa syudad ug aron nga mahusay nganong wala kini miagi sa tukmang proseso sa pagpahigayon sa night market. (BANAT NEWS)