P2.5 milyong shabu nasakmit sa Bohol

CEBU, Philippines —  Nasakmit sa kapulisan sa Tagbilaran City Police Station Bohol Police Provincial Office(BPPO) ang mga binulto nga illegal nga drugas atol sa ilahang buy-bust operation sa Purok 8, Barangay Bool, Tagbilaran City, Probinsiya sa Bohol niadtong Biyernes sa udto, Disyembre 19, 2025.

Ang maong mga drugas nasakmit nila gikan sa suspetsado nga si Joseph Morgia, 41, taga Lungsod sa Maribojoc apan nagpuyo na sa Barangay Manga, Tagbilaran City.

Niabot sa 375 grams sa gituohang shabu ang nakompiskar sa kapulisan gikan sa dinakpan nga nibalor og P2.5 million.

Ang maong operasyon resulta kini sa impormasyon nga nadawat sa kapulisan nga matod pa ang suspetsado nalambigit sa paghupot ug pagpamaligya og illegal nga drugas.

Gi-monitor nila ang suspect ug dihang nakompirmar ang operasyon gilusad dayon nila ang buy-bust operation nga miresulta sa pagkasikop sa suspect.

Ang suspetsado pasakaan og kasong kalapasan sa Republic Act 9165. (BANAT NEWS)