Nganong nangayo’g pundo para sa Suroy-Suroy?
CEBU, Philippines — Gipangutana karon ni Association of Barangay Council (ABC) President ug ex-officio board member nga si Celestino "Tining" Martinez kun nganong aduna gihapon budget proposal alang sa Suroy-Suroy Sugbo kun si Gobernador Pamela Baricuatro way planong ipadayon ang maong programa.
Ang Suroy-Suroy Sugbo usa ka flagship program sa administrasyon ni kanhi gobernador Gwendolyn Garcia nga kontra ni Baricuatro sa politika.
Sa maong programa, ang kapitolyo mopahigayon og tourism caravan sa kalungsoran sa probinsya kon diin adunay tour package nga ioffer sa mga partisipante. Pamaagi kini sa pag-promote sa turismo sa mga lungsod ug siyudad sa Probinsya sa Sugbo.
Sa paglingkod ni Baricuatro karong tuiga namahayag kini nga dili ipadayon sa kapitolyo ang maong programa sanglit mas prayoridad niini ang programa sa panglawas.
Apan sa report sa Committee on Budget and Appropriations sa provincial board nga gipangulohan ni Martinez, ang executive department miduso og P25 milyones nga pondo alang sa Suroy-Suroy Sugbo, kon diin P22 milyones ang alang sa subsidy sa mga local government units/donastion ug ang P3 milyones alang sa ubang maintenance and operating expenses.
Atol sa budget hearing sa budget committee sa hunta probinsyal, ang Provincial Budget Officer nagkanayon nga ang alokasyon nga pundo kinahanglan alang sa maong programa subay sa probisyon sa ordinansa nga nag-establisar sa Suroy-Suroy Sugbo.
Apan matud sa komitiba nga sa maong ordinansa walay gi-set nga kantidad sa pundo alang sa maong programa.
Sa maong report sa budget committee, girekomendar niini nga minusan ang giduso nga pundo Suroy-Suroy ngadto na lang sa P16 milyones.
"Thus, this Committee find it justified to reduce the amount proposed given that the Provincial Governor has already declared early into her tenure that she will not be continuing the programs of the former administration," sumala sa report sa budget committee.
"Allocating a significant amount of fund for programs which will not be pursued is a waste of the provincial government's resources," dugang sa komitiba.
Si Martinez sa iyang Facebook post niadtong Disyembre 19, 2025 kon tangtangon ang Suroy-Suroy Sugbo wala siyay problema niini ug gani iya kining uyonan.
Apan matud usab sa ABC President angay sab pangutan-on ang executive kun nganong nagduso gihapon kini og pundo alang sa maong programa sa tuig 2026.
"Pero pangutan-a kuno ang Executive ngano naa pa na sa ilang budget proposal. Ipatubag kuno na nila ngano naa? Ayaw ninyo pasinganli ang SP," matud ni Martinez.
Ang Banat News mikuha unta og habig sa executive department apan wala pay tubag sa pagsulat sa balita. (BANAT NEWS)
- Latest















