Baricuatro nidepensa sa CPAC

CEBU, Philippines — Gidepensahan ni Gobernador Pamela Baricuatro ang Cebu People's Action Center (CPAC) nga girekomenda sa committee on budget and appropriations sa provincial board nga dili papundohan sa tuig 2026.

Ang buhatan sa gobernador inisyal nga niduso og P14 milyones alang sa CPAC sa sunod tuig.

Apan sa rekomendasyon sa budget committee sa provincial board nagkanayon nga dili pa pormal nga opisina ang CPAC sa Probinsiya sa Sugbo ug ang pag-aproba sa alokasyon niini posibleng moresulta sa disallowances sa Commission on Audit (COA).

Ug gumikan niini, si Baricuatro niluwat og pamahayag diha sa social media nga nidepensa sa pag-establisar sa CPAC nga nagsilbing public complaint desk ug response and support body sa Probinsiya sa Sugbo.

Matud sa gobernador nga ang pagwagtang sa pundo sa CPAC makapahinay sa abilidad niini nga makahatag og serbisyo sa mga Sugboanon.

Gisaysay ni Baricuatro ang nahimong trabaho sa CPAC dihang niigo ang 6.9 magnitude nga linog ug ang bagyong Tino diin ang maong center maoy ni-coordinate sa rescue ug relief operations, niandam ug ni-deliver sa mga hot meal ngadto sa mga evacuation centers ug maoy niadto sa mga lagyo ug lisod adtuon nga mga barangay sa probinsiya.

Si Baricuatro nihagit sa hunta probinsiyal nga maoy manubag sa publiko kon ang plano niini nga dili pundohan ang CPAC nga moresulta sa pagbabag sa mahatag niini nga serbisyo.

Gisaad sa gobernador ngadto sa mga nagtrabaho ug nagboluntaryo lakip na ang mga naserbisyohan sa CPAC nga ipadayon nini ang ilang serbisyo ug adunay transparency.

Ang presidente sa Association of Barangay Council (ABC) ug ex-officio board member nga si Celestino "Tining" Martinez kinsa maoy chairman sa budget committee nitubag usab sa depensa ni Baricuatro sa CPAC.

Giklaro ni Martinez nga ang ilang rekomendasyon nga dili pundohan ang CPAC dili tungod sa politika apan tungod sa legal requirements.

Ang paggahin og pundo mosunod ra kun naestablisar na ang opisina diin ang pundo dili ma-release ngadto sa opisina kon walay balaod nga nagpaluyo niini. Matud ni Martinez kon sukwahi ang pamaagi makonsidera nga ilegal amn paggasto sa pundo.

Dugang ni Martinez nga dili mamahimo nga mapressure ang Sangguniang Panlalawigan tungod lang sa rhetoric o public commentary aron mohimo kini og lakang nga sukwahi sa constitutional ug statutory mandate niini.