Tulo ka tulisan nga nag-ebike nadakpan
CEBU, Philippines — Nadakpan sa kapolisan sa Mambaling Police Station sa Cebu City Police Office ang tulo ka lalaki nga suspetsadong tulisan human sila gikatahong nanulis gamit ang e-bike diha Fatima Street, Natalio Bacalso Avenue, Barangay Dujo-Fatima, Dakbayan sa Sugbo niadtong Lunes sa kadlawon.
Ang mga suspetsado mao sila si Junrex Lao Sagarino, 19-anyos, taga Alaska, Barangay Mambaling; John Walter Jayson, 22, residente sa Barangay Sawang Calero ug Jose Abraham Flores, 21, molupyo sa Sanciangko Street, Barangay Kamagayan, niining siyudad.
Samtang ang mga biktima giila lang sa kapolisan nga sila si alyas “Kirk”, 19, taga Barangay Duljo Fatima ug alyas “Karl”, 27.
Base sa taho sa Mambaling Police Station gikuyogan ni Karl si Kirk nga magduwa og computer diha sa N. Bacalso.
Human magduwa og computer niagi sila diha sa B. Aranas diin sila giatangan sa mga tulisan nga nagsakay og e-bike.
Nideklara og hold-up ang ang mga tulisan ug gitionan nila og kutsilyo ang mga biktima ug gikatahong gihan-an og dunggab hinungdan nga napugos si Karl sa paghatag sa cellphone ni Kirk nga nagkantidad og P12,000 ngadto sa mga tulisan.
Dali nga ni-report ang mga biktima sa kapolisan kinsa dali usab nga niresponde sa hitabo ug nadakpan dayon ang mga suspetsado.
Na-recover sa kapolisan ang kutsilyo nga gigamit sa mga suspetsado ingon man ang cellphone sa biktima.
Gikatahong makuhaan og video ang pagdakop sa mga tulisan kinsa nisuway og ikyas.
Ang mga suspetsado pasakaan kini og tukmang kaso sa nahimo nilang kalapasan. (BANAT NEWS)
- Latest
