Mga bakwit sa Talisay gihatagan og pinaskuhan

CEBU, Philippines — Ang The Freeman ug Banat News pinaagi sa The Freeman Foundation inubanan sa Operation Damayan, ang humanitarian arm sa The Philippine Star nagpahigayon og gift-giving activity kagahapon, Disyembre 14, aron paghatag kalipay sa mga pamilyang naapektuhan sa bagyong Tino sa Barangay Lagtang, Talisay City.

Mokabat sa 250 ka mga relief packs ang gipangapud-apod ngadto sa mga bakwit nga temporaryong nagpuyo sa Talisay Livelihood Training and Assessment Center sa Lagtang. Ang evacuation facility kasamtangang gipuy-an sa mga residente gikan sa Sitio Luna.

Gipangunaham ang maong aktibidad ni The Freeman General Manager Melandro M. Mendoza, uban sa mga staff sa publikasyon, kinsa nidugang og kainit sa outreach pinaagi sa pagsul-ob og Christmas hat atol sa distribution.

Ang mga relief packs, nga naglakip sa lima ka kilo nga bugas, noodles, canned goods sama sa sardinas ug luncheon meat, powdered milk, ug usa ka spaghetti set, gihatag aron makatabang sa pagtubag sa dinaliang panginahanglan sa mga namakwit nga mga residente samtang sila nagpadayon sa pagbangon gikan sa epekto sa bagyo.

Usa sa mga bakwit nga si Gloria Labandero, 58 anyos, nipadayag sa iyang pasalamat sa mga publikasyon ingon man sa The Freeman Foundation ug nipaambit nga lima na ka higayon na silang nakasinati aning pagbakwit tungod sa susamang mga katalagman.

Karon, ang iyang gipangayo nga matabangan silang makabalhinsa mas luwas ug mas accessible nga lugar aron malikayan ang balik-balik nga pagbakwit sa umaabot.

“Kuntento nami sa gipanghatag nila nga bugas, makaon o packed lunch. Ang amo ra gyud kay kapuy-an ra gyud ang among gipangita,” matud niya. “Unta mahimutang nami sa tarong kay ka lima nani namo nahitabo, gikan pa ni sa ginikanan namo, mao nga nasakitan na gyud mi,” niya pa.

Ang Dakbayan sa Talisay usa sa mga lugar nga nakaangkon og dakong kadaot sa Bagyong Tino, nga mi-landfall niadtong Nobiyembre 4.

Ang bagyo nagdala og kusog nga pag-ulan sulod sa pipila ka adlaw nga hinungdan sa pagbaha sa low-lying ug daplin sa suba nga mga komunidad, nga nagpugos sa mga pamilya sa pagbakwit ug daghan usab ang nawad-an sa ilang mga panimalay. — /IBM (BANAT NEWS)