2 patay sa banggaanay sa motor

CEBU, Philippines — Duha ka kinabuhi ang nakalas sa nahitabong panagbangga duha ka motorsiklo sa may Panagsama Road, Sitio Cogon, Barangay Basdiot, Lungsod sa Moalboal pasado alas 3 sa kadlawon kagahapon, Domingo, Disyembre 14, 2025.

Ang nalambigit sa disgrasya sa kadalanan mao ang pula nga Honda 125 motor nga gimaneho ni alyas Han, 17 anyos, taga Purok Sihag-Sihag, Sitio Cogon, Barangay Basdiot sa maong lungsod.

Samtang usa Yamaha N-Max nga gimaneho ni alyas Jay, 21 anyos, nagpuyo sa Sitio Talisay sa mao gihapong barangay.

Dunay duha ka angkas ang 21-anyos nga usa ka 17-anyos nga lalake nga taga Sitio Talisay, Barangay Basdiot ug si alyas Vin nga taga Barangay Lanao, Moalboal.

Sa impormasyon sa Moalboal Municipal Police Station si alyas Han giingong padulong na mouli sa Sitio Cogon, Barangay Bastion gikan kini sa usa ka bar sa Barangay Basdiot.

Samtang si alyas Jay nga giingong hubog angkas ang laing duha ka lalake kusog matud pa ang padagan ug padulong sa Basdiot gikan sa discohan sa Manduyong, Lungsod sa Badian.

Pag-abot sa naasoy nga dapit giingong ang motorsiklo ni alyas Jay nilapas sa opposite lane nga niresulta panagsungag sa duha ka motor.

Tungod sa hitabo, ang duha ka drivers sa motorsiklo apil ang duha ka angkas nangalamba sa dalan ug nakaangkon og kadaut sa ilang mga ulo ug kalawasan.

Dali silang gipangdala sa Badian District Hospital sa mga personnel sa Moalboal Municipal Disaster Risk Reduction and Management Office (MDRRMO).

Apan gideklarar pareho nga dead on arrival ang duha ka drayber. — /IBM (BANAT NEWS)