16-anyos nadakpan sa buy-bust

CEBU, Philippines — Na-rescue sa kapulisan sa Mambaling Police Station 11 Cebu City Police Office (CCPO) ang usa ka 16-anyos nga lalake atol sa ilahang buy-bust operation sa Sitio Puntod, Barangay Mambaling, siyudad sa Sugbo kagahapon sa kadlawon, Martes, Disyembre 9, 2025.  Ang na-rescue mao sab ang subject sa buy-bust operation nga si alyas Burogs, nagpuyo sa Sitio Plastikan, Barangay Duljo Fatima, Cebu City.  Nakuhaan ang menor de edad og 40 grams sa gituohang shabu nga nagkantidad og P272,000 ug naa na karon sa DSWD . Samtang tulo ka mamaligyaay og ginadiling drugas ang nadakpan sa managlahing lugar sa Dakbayan sa Talisay niadtong miaging adlaw.

Ang operasyon gihimo diha sa Purok Kitong, Barangay San Roque nga niresulta sa pagkasikop sa usa ka alyas Kort, 28. Nadakpan sab si alyas Nante sa Purok Nonoc Homes, Barangay Tabunok nga parehong nakuhaan og gamay’ng pakete sa gituohang shabu.

Samtang ang ikatulo nga dinakpan mao si alyas Felicito, 22, diha sitio Mananga 1, Barangay Tabunok nga nakuhaan sab og 0.18 gramong gituohang shabu.

Nagtuo ang operatiba nga nahalin na ang ubang shabu sa mga dinakpan hinungdan nga gamay nalang ang ilang nakumpiska nga shabu.

Samtang nasikop sa kapolisan sa buy bust operation diha sa Barangay Buwagsong sa Lungsod sa Cordova ang duha ka gidudahang drug pushers nga silang alyas Titing, 32,  ug alyas Jojo, 43.

Laing duha usab ka mga drug pushers ang nadakpan sa kapolisan sa Lungsod sa Liloan sa miaging  Lunes sa gabii diha sa Barangay Catarman.

Si Police Lieutenant Colonel Dindo Juanito Alaras, hepe sa Liloan Police Station miila sa duha nga sila si alyas Ading, 31, ug alyas John, 31, nga nakuhaan og 5.25 gramong gituohang shabu nga nagkantidad og P35,700.— Romeo Marantal, Gabriel Bonjoc ug Romeo T. Limpangog, IBM BANAT NEWS