Tulo ka sitio sa Cuanos, naigo sa landslide

CEBU, Philippines — Midahili ang yuta sa tulo ka purok sa Barangay Cuanos sa lungsod sa Minglanilla kagahapon tungod sa paghumok sa yuta tungod sa sige og uwan dala sa bagyong Wilma.

Si Mayor Rajiv Enad nagpasalamat nga walay bisan usa ang naangol sa pagdahili sa yuta sa naapektahang mga purok sa Saging, Purok Cacao ug Purok Lumboy.

Kagahapon, padayon ang gihimo nga clearing operation gamit ang heavy equipment aron maablihan pagbalik ang agi-anan ug mabalik kini sa normal.

Si Enad niingon nga nahawan na ang Purok Saging ug Purok Cacao sa pagsuwat sa balita.

Ang grupo sa Minglanilla Traffic Commission (MITCOM) Municipal Disaster Risk Reduction and Management Office (MDRROM) ug ang barangay council nagtinabangay aron mahawan nasab ang Purok Lumboy.

Niawhag si Enad ngadto sa moagi sa dapit nga padayon magbinantayon aron malikay sa disgrasya.

Sa laing bahin, usa ka panimalay ang naguba human naigo sa nidahili ngaa yuta ug mga dagkong bato diha sa sitio Sandayong, Barangay Liki, Sogod niadtong adlaw nga Sabado, Disyembre 6, sa buntag.

Nahitabo kini atol sa pagsige og bunok sa uwan sa ilang lugar nga padayon pa gihapong nakamatikod og mga pag-uyog sa yuta tungod sa 6.9 magnitude nga linog niadtong nilabay nga Septiyembre 30, 2025.

Dako ang pasalamat sa tagiya sa balay nga si Jude Armamento, 33, tungod kay wala ray nasakitan o nakalas sa ilahang pamilya kay dali rang nakagawas ang iyang amahan nga niadtong tungora mao ray naa sa balay.

Nahitabo kini alas-8 sa buntag, maayong pagkaguba ug natabunan ang ilang mga kagamitan nga naglakip sa panginabuhian sa iyang ginikanan.

Gitug-an ni Armamento, niadtong nakalabay nga linog aduna pa lang kini liki apan tungod sa sige ug ulan ug padayung pag-uyog maoy ilang dako nga pagtuo sa hinungdan sa pagkayagyag sa maong mga dagkong bato ug yuta gikan sa ibabaw.

Si Adela Armamento, nitug-an nga grabe na ang ilang nasinati nga pagsuway gikan sa linog, bagyo ug pagkahagsa sa mga bato sa ilang balay mao naglibog na sila kung unsaon nga pagbangon ilabi na wala na silay panginabuhian.

Gipadayag ni Armamento, ang iyang mga gitrabaho nga order nga mga shell craft nga kuhaonon na unta kini apan dili na nila mapahimuslan kay nadat-ugan man tanan. — /IBM (BANAT NEWS)