Nagdala’g granada

CEBU, Philippines — Gidakop ang usa 33-anyos nga babaye sa mga gwardiya sa usa ka establisemento sa Hernan Cortes Street, Barangay Tipolo, dakbayan kay nagdala matud pa og armas ug granada.

Ang gidakop mao si alyas Lanie, 33 anyos, nagpuyo sa Dakbayan sa Lapu-Lapu.  Samtang ang nagdakop niya mao ang security guard ug security officer sa maong establisimento.

Ang maong armas ug Granada gikatahong gisulod sa gibitbit nga sling bag sa suspek apan sa pag-inspeksyon nakit-an kini hinungdan nga siya gidakop.

Nakuha gikan niya ang usa ka hand grenade, usa ka kalibre .45 pistola, magazine nga dunay pito ka bala. Wala siyay napakitang balidong dokumento sa pagdala niinin hinungdan nga nanawag ang mga gwardiya og polis.

Ang mga sakop sa a Explosives and Ordnance Division (EOD)-7 daling nisusi sa establisamento ug gisakmit ang granada  ug armas.

Ang babaye gidala sa buhatan sa Criminal Investigation and Detection Group (CIDG)-7 alang sa dugang imbestigasyon.

Gisusi pa ang background sa maong babaye ug kun unsay rason nganong nagdala kini og armas ug granada.

Ang suspek ug pasakaan og kasong kalapasan sa Republic Act 10591 ug Republic Act 9516.

Sa pikas bahin, gidakop mga sakop sa Criminal Investigation and Detection Group(CIDG) Mandaue City Field Unit ang usa ka 65-anyos nga lalake human nakuhaan og armas ug mga bala pinasikad sa search warrant diha sa Sitio Dasuga 1, Barangay Don Andres Soriano, Toledo City niadtong Biyernes sa gabii, December 5, 2025.

Ang gidakop mao si alyas Rael, 65 anyos, nagpuyo sa naasoy nga dapit kinsa gireklamong naghupot kini og armas.

Ang search warrant giisyu ni Judilyn Hugo Tapia Menchavez, Executive Judge sa Regional Trial Court(RTC) Branch 8, Toledo City  tungod sa paglapas sa Republic Act 10591 o Comprehensive Firearms and Ammunition Act penetsahan December 1, 2025.

Nakuha gikan sa balay sa suspek ang usa ka kalibre .45 pistola, lima ka bala niini, 13 ka bala sa 9mm, laing walo ka bala sa kalibre .45, usa ka air gun rifle, camouflage holster ug uban pa.

Ang mga dinakpan pasakaan og kasong paglapas sa Republic Act 10591.