Pag-institutionalize sa Oplan

Pakigsandurot gitinguha

CEBU, Philippines — Human sa kapin upat ka buwan sukad gilusad pag-usab ang Oplan Pakigsandurot, si Cebu City Councilor Paul Labra II misaad nga i-institutionalize ang programa, nga nagtumong sa pagpalig-on ug pagpalugway sa pagpatuman niini bisan pa sa posibleng pagbag-o sa administrasyon sa umaabot nga  katuigan.

Kahinumduman, ang Oplan Pakigsandurot usa ka community-based anti-criminality program sa dakbayan nga gipasiugdahan sa paglaom nga makatukod og mas lig-on nga koneksyon tali sa barangay, kapolisan, ug sa kagamhanan sa dakbayan.

Sa pagpangulo ni Labra, kinsa kanhi police brigadier general ug kasamtangang nagsilbi isip chairman sa peace and order committee sa konseho sa dakbayan, ang maong programa gibalik niadtong Hulyo ning tuiga.

Ang pilot relaunching niini gipahigayon sa Barangay Luz ug gisundan sa laing 79 ka barangay sa north ug south district sa dakbayan sa Sugbo.

Si Labra nagkanayon nga ang iyang buhatan naghimo na karon og legislative measures nga gitumong sa pagpatunhay ug pagpakusog sa Oplan Pakigsandurot.

Kini human ang paglusad balik sa programa nakahatag og positibong epekto sa pagpugong ug pagkunhod sa kriminalidad sa mga barangay sa dakbayan.

Subay sa gisugyot nga ordinansa, si Labra niingon nga moduso usab sila og resolusyon nga mag-awhag sa Chief Executive sa pag-isyu og Executive Order (EO) aron masuportahan pa ang programa sa papel.

Dugang pa niya nga nanghinaot siya nga ang EO nga nagsuporta sa programa mapagawas sa unang quarter sa 2026 uban ang hingpit nga suporta sa tibuok konseho sa dakbayan.

Isip kabahin sa proseso sa pamalaod, si Labra miinsistir nga ang Oplan Pakigsandurot kinahanglan usab nga pondohan. Matod niya, ang lokal nga kagamhanan kinahanglan nga madugangan ang limitado nga budget sa mga barangay.

Samtang ang Cebu City Police Office (CCPO) nga maoy counterpart sa kagamhanan sa dakbayan sa pagpatuman sa maong programa, nihimo usab og assessment sa tanang 80 ka barangay sa  dakbayan.

Ang maong aktibidad gitumong sa pag-evaluate sa gihimong pagpatuman sa Oplan Pakigsandurot sa tanang partner barangays.

Sa laing pakighinabi, si Police Lieutenant Colonel Jose Los Baños, ang information officer sa CCPO, niila nga ang programa adunay dakong kontribusyon sa mga paningkamot sa kapolisan batok sa krimen.

Matud ni Los Baños nga ang assessment gihimo pinaagi sa tabang sa 13 ka police stations sa tibuok dakbayan, diin ang matag barangay nga sakop sa ilang hurisdiksyon hiniusang nagtapok aron sa pagpresentar sa accomplishment reports kalabot sa kalinaw ug kahapsay sa ilang komunidad. —Nicholas Jon Malaga/MEL