Moretirong BHWs pahatagan og P10,000

CEBU, Philippines — Hatagan og tag P10,000 nga cash incentives ang moretiro nga barangay health workers (BHWs) samtang tag P7,000 sab ang para sa mga aktibo pa nga mga BHWs sa Probinsya sa Sugbo.

Kini maoy gianunsyo ni Gobernador Pamela Baricuatro atol sa iyang mensahe sa mga BHWs sa Probinsya atol sa BHW Summit kagahapong adlawa, diin sobra 9,000 ka BHWs ang mitambong niadtong Disyembre 5, 2025. Aduna pay set sa uniform ug noche buena packs ang alang sa maong mga kawani sa barangay.

Atol sa iyang mensahe, ang gobernador nagpasalamat sa mga BHWs sa ilang dedikasyon sa trabaho ug gipahimug-atan ang ilang papel isip maoy backbone sa grassroots healthcare hilabina sa mga lagyo nga lugar sa probinsya.

Gipasidunggan usab ni Baricuatro ang kaisog ug kalig-on sa mga BHWs hilabina human sa 6.9 magnitude nga linog ug sa sunod-sunod nga bagyo.

“Dili mo assistant. Dili mo extra. You are partners in building a healthier Cebu,” matud ni Baricuatro.

“You are the strength behind Cebu’s recovery and the hope behind our healthier future. Kuyog tang tanan, let us build a Cebu nga mas luwas, mas andam, mas lig-on, ug mas healthy para sa tanan,” dugang sa gobernador.

Ang maong summit gi-organisar isip kabahin sa selebrasyon sa BHW day nga nag-highlight sa papel sa mga BHWs  isip mga frontline healthcare sa komunidad nga dako ang natampo sa pag promote og disease prevention, maternal ug child health, ug community-based wellness initiatives.