Shabu nibugol sa shorts, katabang sakpan

CEBU, Philippines — Nabalhug sa bilanggoan ang usa ka katabang human nasakpan ang ilegal nga drugas nga iyang gipasupot sa gidala niyang mga gamit para sa iyang kapuyo nga natanggong sa Talisay City Detention Cell sa Barangay Lawaan 2, Dakbayan sa Talisay niadtong Miyerkules sa hapon.

Ang dinakpan mao si alyas Vilma, 47, nga taga sitio Long Dream, Barangay Lagtang , giingong naghatud og personal nga gamit para sa iyang kapuyo nga si alyas Jerry.

Apan sa pag-inspeksyon sa jailer nakabantay kini sa kadudahang bugol diha sa hawak sa usa sa mga shorts ug sa dihang gisusi,  upat kii ka gagmay’ng pakete sa gidudahang shabu. Tungod niini, ang duha mag Pasko sa prisuhan. Samtang nadakpan sab sa mga operatiba sa Mabolo Police Station 4 Cebu City Police Office ang usa ka 31-anyos sa buy-bust operation sa Sitio Kalinao, Barangay Carreta, Siyudad sa Sugbo niadtong Miyerkules sa gabii, Disyembre 3, 2025.

Si alyas Bayot,  usa ka high value individual, nakuhaan og 10 gramos nga gituohang shabu.

Human sa pila ka buwan nga pagtago-tago sa balaod nadakpan sa kapulisan sa Argao Municipal Police Station ang Top 5 Most Wanted Person Regional ug Provincial Level ingon man kauban niini diha sa Barangay Bogo,  Lungsod sa Argao Huwebes sa kadlawon, Disyembre 4, 2025.

Pinasikad sa warrant of arrest sa kasong kalapasan sa Section 5, Article II sa Republic Act 9165 (Illegal drugs), nadakpan si Alan Milay Alcayde alyas Palog, 45 ug ang kauban niining si  Joel Gevera Rufo, 49.

Atol sa pagdakop, nakuhaan si Alcayde og 6.0 grams sa gituohang shabu samtang si Rufo nakuhaan og kalibre .38 revolver nga dunay duha ka bala.  IBM BANAT NEWS