Pagpangita sa unom nga missing ipadayon sa CCDRRMC

CEBU, Philippines — Usa ka buwan na ang milabay human sa pagkuso-kuso sa Bagyong Tino sa Dakbayan sa Sugbo, apan duna pay unom ka indibidwal nga wa pa makit-i nga giingon nga naanod tungod sa kakusog sa bul-og sa tubig sapa sa amihanang distrito.

Matud pa ni Konsehal David “Dave” Tumulak, kinsa tsirman sa Cebu City Disaster Risk Reduction and Management Council nga dili ihunong ang pagpahigayon sa search and retrieval operation alang sa mga indibidwal nga gideklarar missing.

“We cannot say nga ihunong kay we know the agony, the pains sa family. If we say nga among hunungon, it’s unfair. As long as makita gyud ni namo ang unom. If moingon ang pamilya nga mohunong nami, mohunong na sab mi”, suma pa ni Tumulak.

Dugang pa ni Tumulak nga naabot na sila sa sapa sa Barangay Cotcot, Barangay Lusaran, Barangay Paril ug sa may habig sa munisipalidad sa Compostela og pinangita sa mga lawas sa unom ka indibidwal.

Si Tumulak miingon nga ang paningkamot sa sakop sa CCDRRMO agi kini og pagtabang sa mga pamilya nga nidangop kanila aron pangitaon ang lawas sa ilang mga kabanay aron masuta kung may kinabuhi pa ba kini o wala na.

Tungod kay nilanat na og usa ka buwan ang pagpangita, nanawagan si Tumulak sa mga kabanay sa unom ka indibidwal nga motambong sa profiling diin magpahigayon og DNA test karong Disyembre 17, 2025 kauban ang Management of the Dead and Missing, National Bureau of Investigation, Philippine National Police, City Health Department ug Kagamhanan sa Dakbayan sa Sugbo.

Tumong sa profiling aron dili makahatag og kalibog sa mga kabanay ug mapadali ang pagtino sa pagpanag-iya sa mga mapalgang lawas sama nalang sa nahitabo niadtong Noyembre 26 kun diin duha ka pamilya ang nag-ilog sa patay nga lawas nga napalgan sa bukirang bahin sa Compostela tungod kay managsama kini og sapot nga gisul-ob apan nailhan lang kini tungod sa gisul-ob nga singsing.

Sa pagkakaron, nagtinabangay ang kagamhanan sa Dakbayan sa Sugbo ug ang Munisipalidad sa Liloan ug Compostela sa padayon nga pagpangita sa mga missing nga mga indibidwal.

Sa laing bahin, inanay na sab nga gipanglubong sa sakop sa CCDRRMO ang mga binuhing hayop nga namatay tungod sa bagyo.  (BANAT NEWS)