Misa de Gallo gipangandaman sa kapolisan
CEBU, Philippines — Andam na ang security plan sa Cebu City Police Office alang sa pagsugod sa Misa de Gallo suma pa ni CCPO OIC City Director Police Colonel George Ylanan.
Matod ni Police Colonel Ylanan mimando na siya sa iyahang mga police station commanders nga makig-alayon sa kadagkuan sa simbahan.
"Naa na tay security plan ana in coordination with our ground commanders didto sa ground gyud nga sila mismo nakipag coordinate sa mga parishes ng churches sa ilang area of responsibility", matod ni Ylanan.
Si Colonel Ylanan nipasalig nga mabatyagan gyud sa katawhan ilabi na sa mga manimbahay ang presensiya sa kapolisan pinaagi sa maximum police visibility deployment.
Gibantayan sab sa CCPO ang mga indibidwal nga mopahimulos sa kahigayonan, mohimo og kasamok o kaha dunay plano mohimo og dautan.
Gawas sa deployment sa mga simbahan hingusgan sab sa CCPO ang pagpatrolya sa residential areas aron dili mabiktima sa mga kriminal.
"We are aiming for zero incident during this holiday season", ni Col. Ylanan pa. (BANAT NEWS)
- Latest
