SUPAKK malinawon ug hapsay   

CEBU, Philippines — Malampuson nga nabantayan sa Police Regional Office (PRO)-7 ang malinawon nga pagpahigayon sa anti-corruption rally sa Central Visayas niadtong November 30, 2025 nga giulohan og Sugbuanon Pakigbisog Kontra Korapsyon (SUPAKK) Peaceful and Prayerful Walk nga gipangulohan ni Archbishop Alberto "Abet" Uy kauban ang bagang duot sa katawhan.

Si PRO-7 Regional Director Police Brigadier General Redrico Maranan midayeg sa mga sakopnga na-deploy sa rally routes, convergence areas ug identified critical points.

Nagpasalamat sab si Maranan sa mga raliyista nga nisunod sa balaod ug walay naghimo og kagubot.

Sa pikas bahin, si Mayor Nestor Archival nalipay nga malinawon ra ang maong kalihukan ug walay mga kakulian nga nahitabo.

Sumala pa ni Archival, base sa bana-bana ni konsehal Dave Tumulak kinsa maoy chairman sa CDRRMO niabot ngadto sa 10,800 ka mga tawo ang niapil sa maong kalihukan.

Gitug-an ni Archival, hugot gayud ang iyang suporta sa bisan unsa nga kalihukan sa katawhan.

Suportado usab sa mayor ang panawagan sa arsobispo nga kinahanglang mohimo og mga pamaagi nga maglisud ang mga kurakot sa pagpangawat sa pundo sa katawhan. (BANAT NEWS)