Mga taxi palimpiyohan

CEBU, Philippines — Giawhag ni Konsehal Sisinio “Bebs” Andales ang tanang operator ug drayber sa mga taxi nga manglimpiyo sa ilang mga unit tungod kay nisaka ang reklamo ug kabalaka gikan sa mga pasahero kabahin sa kahugaw sa sulod sa pipila ka taxi sa Metro Cebu.

“Based on reports and observations, some taxi units operating in Metro Cebu have interiors poorly maintained, unsanitary and unpleasant for passengers”, padayag ni Andales.  Nalatid sa resolusyon ni Andales nga ang kahimtang sa sulod sa taxi adunay dako nga epekto sa kasinatian sa pasahero, kahimsog sa publiko ug hulagway sa siyudad diin daghang lokal nga mga pasahero, bisita ug turista ang nakasinati na niini.

Gipasabot ni Andales nga kinahanglang mamentinar ang kalimpiyo ug sanitasyon sulod sa taxi ilabi na ang lingkuranan, salog, bintana ug air-conditioning system diin mao kini sukaran ug responsibilidad sa mga drayber ug operator. Matud ni Andales nga ang kalimpiyo maoy labing importante aron mapabilin ang dignidad ug professionalism sa transportasyon sa siyudad.

Nanawagan si Andales sa Land Transportation Franchising and Regulatory Board (LTFRB) ug Cebu City Transportation Office (CCTO) sa pagpalig-on sa ilang monitoring ug pagpapatuman sa mga standard sa kalimpiyo pinaagi sa pagpahigayon og inspeksiyon.

Ang inisyatibo gilaoman nga makatabang sa pagpauswag sa kalidad sa pampublikong transportasyon ug makahatag og mas maayong kasinatian sa mga lokal nga pasahero ug mga bisita sa siyudad.