E-Bike, E-Trikes bawal na

CEBU, Philippines — Sugdan na sa Land Transportation Office (LTO) ang pagdili sa pagbiyahe sa e-bikes ug e-trikes sa mga major roads sa dakbayan ug syudad sa tibuok nasud sugod karong Disyembre 1. Ang lakang gisunod sa plano sa ahensya nga paligonon ang regulasyon sa electric vehicles tungod sa nagkadaghan nga aksidente sa trapiko nga naglambigit aning mga Light Electric Vehicles (LEVs).

Sa giandam nga guidelines, gibutang didto sa  nga bawal modagan sa national roads ang e-bikes, e-trikes, mobility scooters, ug uban pang light electric vehicles nga dili tungod sa safety standards sa kalsada.

Ang mga traffic enforcers sa LTO mo-impound sa mga LEVs nga magdagan sa mga major roads ug highways sa tibuok nasud.

Usa sa mga giingong rason niini tungod kay daghan na kaayong nagdagan nga mga LEVs nga dili rehistrado, ang mga drayber walay lisensya,  walay accident insurances ug uban pa.

Giisip kini nga risgo sa kadalanan ilabi na sa lugar nga daghan ug dagkong sakyanan.

Nagtuo ang LTO nga ang pagpatuman sa maong polisiya patas kini nga regulasyon para sa tanan ilabi na sa mga tradisyonal nga public utility vehicles ug sa e-bike users nga wala gabayad og parehas nga requirements.

Gitugotan gihapon ang paggamit sa e-bikes ug e-trikes sa barangay roads ug sulod sa komunidad depende sa rules sa lokal nga kagamhanan.

Ang Department of Transportation pinaagi sa LTO mopakatap sa maong polisiya sa nagkadaiyang local government units aron masiguro ang hapsay nga pagpahibalo ug pagpatuman sa bagong polisiya.

Ang lakang nagtinguha nga mapauswag ang kaluwasan ug disiplina sa trapiko samtang nagpadayon ang pagdagsa sa electric vehicles sa nasud.

Apan si Rep. Terry Ridon (Bicol Saro Party-list) kusganong misaway sa polisiya kay matud pa wala kini legal nga basihan ang pagdakop ug pag-impound sa mga LEVs ug pagdili kanila nga makadagan sa mga major roads ug highways ubos sa Electric Vehicle Industry Development Act (EVIDA Law).

Samtang giangkon niyang kinahanglang rehistrado aron makadagan ang mga pasaheroang LEVs,  kinahanglang nga klaruhon sa DOTr kung kinsa ang namasahero ug kun kinsa ang gigamit kini isip pribadong sakyanan ug dili angay parehason pagtratar tungod lang ka sila mga LEVs.

Giklaro sab ni Ridon nga walay probinsya sa EVIDA Law nga gidid-an ang mga LEVs nga makadagan sa mga dagkong kadalanan.

“For-hire LEVs should be regulated by the national and local governments in the same manner as other for-hire modes of transportation, such as tricycles,” matud pa niya sa repor sa Philstar.com.

Matud pa niya, ang naa sa balaod mao ang pagbuhat og lane kauban sa bike lanes para maoy agian sa mga LEVs.

Si Ridon mao ang tsirman sa public accounts committee ug sakop sab sa transportation panel, miingon nga dili pwedeng ang LEVs maoy basulon sa mga isyu sa transportasyon sa nasud karon kondili tugotan dapat kini kay mao ran i kaya sa mga kabus nga pamilya nga makabaton og kaugalingong matang sa transportasyon.— IBM BANAT NEWS