Sea ambulance wala pa mapalit sa Kapitolyo?

CEBU, Philippines — Giklaro sa Probinsiya sa Sugbo nga wala pa kini hingpit nga nakapalit og sea ambulance sukwahi sa unang gi-post sa Kapitolyo sa Facebook page niini nga Cebu Province nga naka-acquire na og labing una nga sea ambulance ang probinsiya.

Ang maong sea ambulance ang gikataho nga gipahulam kini sa supplier.

Niadtong Oktubre 7, 2025 ang Kapitolyo pinaagi sa opisyal Facebook page niini gipresentar ang maong sea ambulance diin anaa si Gobernador Pamela Baricuatro sa hulagway ug ubang opisyales sa probinsiya.

Nag-ulohan sa maong post ang “Strengthening Emergency Response in Cebu Capitol acquires first-ever Sea Ambulance".

Atol sa budget hearing alang sa proposed P319 milyones nga pundo sa Cebu Provincial Disaster Risk Reduction and Management Office (CPDRRMO) usa sa natuki mao ang sea ambulance nga maoy gigamit sa Kapitolyo paghatud og medisina ngadto sa Isla sa Camotes.

Si ABC President ug ex-officio board member Celestino "Tining" Martinez, chairman sa  Committee on Budget and Appropriations sa hunta probinsiyal nangutana kabahin sa paggamit na sa sea ambulance nga wala pa man kini mapalit sa Kapitolyo.

Si Danilo Rodas, provincial budget officer nagkanayon nga kabahin kini sa market survey kon unsa nga klase sa sea ambulance ang gamiton.

Samtang si Martinez nangutana usab kabahin sa pagbutang og pangalan ug logo sa Cebu Province sa maong sea ambulance kon wala pa kini gipanag-iya sa probinsiya.

Sa iyang bahin, si Rodas niklaro nga wala magpasabot nga ang maong sea ambulance na gyud ang paliton sa Kapitolyo diin moagi pa kini og public bidding.

Niadtong Oktubre 12, 2025 nag-post na usab ang Cebu Province og video sa susamang sea ambulance nga maoy gigamit sa paghatud og medisina ngadto sa Isla sa Camotes.

Si Dennis Pastor, hepe sa CPDRRMO nagkanayon nga ang paggamit sa maong sea ambulance kabahin sa 50 ka oras nga sea trial o pag-test sa maong speed boat.

Samtang  gibutyagni Rodas nga ang supplier sa maong sea ambulance mao ang Dynacast, susamang supplier sa generator sets sa Isla sa Malapascua.

Sayo pa, ang Kapitolyo nagkanayon nga ang maong pioneering project nahimong posible pinaagi sa tinguha sa PDRRMO nga makatabang sa pagpalambo sa health services sa probinsiya ubos sa administrasyon ni Gobernador Pamela Baricuatro.

Ang Kapitolyo nagplano sa pagpalit og sea ambulance diin matag usa nagkantidad og P25 milyones.  BDB BANAT NEWS