10%  sa PDLs dunay cellphone

CEBU, Philippines — Ubay-ubay nga mga kontrabando ang nasakmit sa mga otoridad sa kalit-kalit nga greyhound operation sa mga selda sa Cebu Provincial Detention and Rehabilitation Center (CPDRC).  Ang greyhound operations gihimo sa Cebu Police Provincial Office (CPPO), Special Operations Unit (SOU)-7 PNP Drug Enforcement Group, ug Regional Special Police Unit-7  kagahapon sa buntag, Huwebes, Nobiyembre 27, 2025.

Nakompiskar sa mga otoridad ang 104 ka mga cellular phones, kwarta, mga mahait nga hinagiban, chargers ug uban pang mga kontrabando nga gipalusot sa maong prisohan.

Matud sa warden sa CPDRC Retired Superintendent Felipe Montejo ang operasyon gimando mismo sa Provincial Capitol.

Si Montejo nagkanayon nga gidili gyud ang cellphones sa sulod sa pasilidad sanglit sila sa CPDRC duna may e-tawag nga maoy pwede gamiton sa mga inmates aron ma-contact ang ilahang mga pamilya nga naa sa gawas.

Gisubay na nila kung nganong nakalusot ang mga cellphone ug ubang kontrabando sa pasilidad.

Samtang si Investigation Agent III Jonar Cuayzon sa PDEA-7 miingon tumong sa maong surprise greyhound operation mao ma-introduce nila ang ilahang programa nga jail clearing.

Gusto nilang ibalik ang tumong o intensiyon nga ang mga prisohan magsilbing rehabilitation center sa mga dinakpang nalambigit sa ilegal nga drugas.               Kung mahinumdoman, sa matag madakpang drug pushers, sagad nilang itug-an nga ang ilang mga transaksyon sa ilegal nga drugas anha gagikan sa ilang mga agalon nga naa sa mga prisohan pinaagi sa cellphone.

Giangkon sa PDEA nga makapabalaka kining gidaghanon sa mga cellphones nga na-recover hinungdan nga i-rekomendar nila nga pahugtan pa gyud ang pagsiksik sa mga ipasulod.

Kaniadto pa duna nay nanggawas nga mga report nga dunay mga staff sa mga prisohan nga gihimong pangwarta ang pagpalusot og mga kontrabando sama anang mga cellphones ug gadgets para sa mga inmates nga kwartahan.

Apan wala pay napamatud-an sa maong mga alegasyon bisan sa kadaghan na sa gihimong mga greyhound operations sa nanglabay nga mga katuigan. "This number medyo kabalak-an gyud ni siya kay out of 900 plus inmates 104 atong na-recover so that compromises around 10 percent nga naay phone nga na-recover lang nato, so naa pa gyud tay gi expect nga wala pa na recover so what if this phone this phones are being use to facilitate drug transactions pero dili pa gyud ta ka conclude ana, maghuwat pa gyud ta sa forensic nato ana kung unsay makita nato," sigon ni Cuayzon.

Ang CPDRC dunay 993 PDL diin 80 kapin niini mga babaye nga ang mga kaso sagol-sagol nga krimen apil na ang ilegal nga drugas. (BANAT NEWS)