Patrolman naunay  sa iyang armas

CEBU, Philippines — Naangol ang usa ka bagitong polis human aksidenteng naunay sa iyang service firearm samtang nangandam alang sa deployment samtang naa siya sa iyahang boarding house sa Sitio Gahad, Barangay Poblacion, Lungsod sa Sibonga niadtong Miyerkules sa gabie, Nobiyembre 26, 2025.

Ang naunay mao ang 29 anyos nga lalake nga aktibong polis, nag-ranggo og Patrolman, taga Proper Cambang-ug, Toledo City ug nadestino sa Regional Mobile Force Battalion (RMFB)-7, Camp Ceperino Genovia, Barangay Bahay, Lungsod sa Sibonga.

Una niini, ang Sibonga Municipal Police Station nakadawat og tawag gikan sa concerned citizen ug nagpahibawo sa matud pa sa nahitabo sa maong polis. Sa inisyal nga imbestigasyon sa kapulisan, base sa pamahayag sa classmate niini nga polis, naa sa sulod sa boarding house niini ang iyang kauban nag-andam sa mga gamit alang sa deployment sa Cebu Police Provincial Office(CPPO).

Kalit lang siyang nakadungog og usa ka buto sa armas, nakit-an niya ang biktima nga nigawas sa kwarto nga nagkadugo human nakaangkon og samad pinusilan sa tiyan ug nangayo og tabang.

Sigon pa sa classmate ngadto sa kapulisan nga aksidenteng nakablitan ang armas niini nga .9mm.  Daling gidala ang biktima sa Deiparine Community Hospital sa MDRRMO personnel alang sa medical attention.

Nagpadayon sab ang imbestigasyon sa otoridad labot niini. (BANAT NEWS)