Kusog nga hangin ug ulan   

CEBU, Philippines — Kusog nga pag-ulan ug hangin ang masinate sa baybayon ug kabukiran sa Cebu ug mga kasikbit nga isla nonot sa Tropical Depression Verbena. Base sa gipagawas nga Tropical Cyclone Bulletin no. 4 sa PAGASA kagahapon sa alas 5 sa hapon naka-landfall na kini sa Bayabas, Surigao del Sur ug naglihok padulong sa Agusan del Norte.

Ang bagyo adunay maximum sustained winds nga 45 km/h ug hangin nga moabot sa 75 km/h, naglihok padulong sa west-northwest sa gikusgon nga 30 km/h.

Gipaubos sa Tropical Cyclone Warning Signal no.1 ang Cebu ug ang ubang parte sa Visayas, lakip ang Negros, Bohol, Leyte, ug Samar.

Samtang gisuspenso ang klase lukop Probinisya sa Sugbo kagahapong adlawa isip pagpangandam sa epekto sa tropical Depression nga Verbena.

Ang Cebu Provincial Disaster Risk Reduction and Management Council (PDRRMC) gipangulohan ni gobernador Pamela Baricuatro miluwat og advisory alang sa mga angay nga himoon pangandam sa bagyo.

Sa maong advisory, kanselado ang face-to-face classes sa Probinsya hangtod sa dugang kamandoan ug iagi lang usa sa alternate learning modality ang klase sa tanang lebel sa mga pampubliko ug pribadong eskwelahan sa Probinisya sa Sugbo.

Ang mga city/municipality lakip na mga barangay DRRM council gimandoan nga mag-andam ug magmonitor sa ilang mga lugar ilabina sa mga dapit nga delikado sa pagbaha ug pagdahili sa yuta.

Si Baricuatro miawhag usab sa mga Sugboanon nga maminaw sa lokal nga otoridad kon kinahanglan na pabakwiton aron makalikay sa disgrasya.

Sa lungsod sa Danao, si Mayor Nito Durano miluwat og executive order pagsuspenso sa trabaho sa tanang mga opisina sa City Hall lakip na sa mga ahensya sa gobyerno nga adunay opisina sa dakbayan sukad kagahapon sa udto hangtod karong adlawa sa udto.

Walay labot sa suspensyon sa trabaho ang mga opisina nga ang trabaho may labot sa emergency response ug operasyon sama sa CDRRMO, City Health Office, City Social Welfare and Development Office, City Engineer's Office ug uban pa. (BANAT NEWS)