Nipirma og waiver namatay

CEBU, Philippines —  Usa ka motorsiklo ug ambulansiya nagkabinanggaay diha sa eskina sa dalan Gen. Maxilom Avenue ug MJ Cuenco Avenue  sa Barangay Carreta, Cebu City niadtong alas-4 sa kadlawon sa miaging adlaw (Biyernes).

Una niini, ang rider sa motor nga si Richard Campoy Estrada  Jr., 35, taga Barangay Sambag 2, Cebu City gikatahong nagkabanggaanay sa usa ka ambulansiya.

Hangtud ning pagsuwat sa balita, wala pa mailhi sa kapolisan ang driver sa ambulansiya tungod kay nagkasabot ra ang duha ka habig ug namauli pareho human sa nahitabo. 

Apan pagka- Biyernes sa hapon, gikatahong nagmulo sa kasakit sa iyang tiyan ang biktima ug dangtan pila ka gutlo nabugtoan kini sa kinabuhi mao nga ni-report ang mga kabanay ngadto sa kapolisan sa nahitabo niini.

 Base sa gihimong imbestigasyon sa Traffic Enforcement Unit sa Cebu City Police Office ug  sa nakuha nilang CCTV footage ang motorsiklo ug ambulansiya nagdagan gikan sa managlahi nga direksiyon.

Pag-abot sa naasoy nga dapit nakita nga ang ambulansiya anaa na sa junction box ug naka blinkers padung mo left turn sa dihang ang biktima gikan sa opposite lane gikatahong ni-overtake sa laing motorsiklo nga ni giveway sa ambulansiya.

Hinungdan nga kining nagkabanggaanay na hinuon sa maong ambulansiya diha sa junction box. Matud pa nga tungod sa impact, natumba ang driver sa motorsiklo.

Gisusi matud pa sa driver sa ambulansiya ang driver sa motorsiklo ug dad-on unta kini sa tambalanan. Dunay ubang mga nagmotorsiklo sab nga nihunong ug nisusi sab sa biktima.

Apan imbes nga mosanong sa awhag sa driver sa ambulansiya, gikataho nga nagdumili kini ug nipirma hinuon og waiver, hinungdan nga nibiya sa lugar ang ambulansiya.

Ang mga tawo didto mao nay nitabang paghatud sa biktima ngadto sa ilang balay sa Sambag 2. Apan pagkahapon nakabsan kini sa kinabuhi.

Gisusi pa karon sa kapolisan kun sa asa nga ambulansiya kadtong nakabanggaanay sa biktima. (BANAT NEWS)