DOH: Home based cancer treatment dili tinuod

CEBU, Philippines —  Nagpasidaan ang Department of Health (DOH) sa publiko batok sa mga peke nga website ug social media pages nga nagtanyag og “home-based cancer treatment” gamit ang pangalan sa ilang ahensya. Sa usa ka advisory nga gipagawas niadtong Nobiyembre 21, human nabantayan sa ahensiya ang mga online posts nga gigamit ang ngalan ug logo sa DOH aron i-advertise ang mga tambal ug pamaagi sa pagtambal sa kanser nga himoon ra sa balay.

Giklaro sa DOH nga wala susama niini nga matang sa cancer treatments nga gitugot sa ilang ahensiya.

Matud pa sa DOH, ang tanang matang sa pagtambal sa kanser sama sa chemotherapy, radiotherapy, operasyon, immunotherapy, ug palliative care, kinahanglan nga ipahigayon lamang sa kwalipikadong health professionals sa mga lisensyadong medikal nga pasilidad nga accredited sa ilang buhatan.

Ang DOH dunay mga programa aron pagtabang sa mga pasyenteng dunay kanser sa nasud sama sa: Cancer Assistance Fund, nga dunay 34 ka operational Fund sites lukop nasud; Cancer ug Supportive - Palliative Medicines Access Program; gipalapad nga mga site sa pag-atiman sa kanser; gipauswag nga patient navigation services ug; gipalig--on nga pakigtambayayong sa cancer centers.

Giawhag nila ang publiko nga dili magpailad aning mga namaligya og mga tambal sa online kay nagpakatap kini og sayup nga impormasyon mahitungod sa medisina  nga mosangpot sa kahadlok sa uban ug dili na hinuon magpatambal.

Kung dunay gipamati sa kalawasan, kinahanglang mokonsulta sa mga lisensiyadong mga medical professionals. (BANAT NEWS)