Gi-hostage ang pamilya
CEBU, Philippines — Gumikan sa pangabubho gi-hostage matud pa sa usa ka padre de pamilya ang mag-inahan niini sulod sa ilahang kwarto sa Purok Tamprut, Barangay Poblacion, Lungsod sa Compostela pasado alas 8 sa buntag kagahapon sa buntag, Nobyembre 17, 2025.
Ang mga biktima mao manag-inahan. Ang bata nag-edad pa og 7-anyos samtang ang suspek 33 anyos. Una niini, ang Compostela Municipal Police Station nakadawat og tawag gikan sa concerned citizen nga nangayo og tabang labot sa lalake nga gi-hostage ang kaugalingong pamilya.
Ni-responde dayon ang Compostela Municipal Police Station pinangulohan sa ilahang hepe Police Major Joseph Aquino uban ang Danao City SWAT Team ubos sa superbisyon ni Police Lieutenant Colonel Henrix Bancoleta.
Pag-abot sa kapulisan sa lugar nakit-an nila ang suspetsado nga pugsanong gitanggong sa lawak ang iyang asawa ug anak ug giingong nanghulga nga patyon sila gamit ang hait nga hinagiban. Dunay nahitabong negosasyon hangtod nga nakahigayon sa pagsulod sa kwarto sa suspek ang mga polis ug gidakop kini.
Nasayran sa imbestigasyon nga nagkalalis ang magtiayon tungod sa selos.
Ang suspek pasakaan kini og kasong Serious Illegal Detention ug kalapasan sa Republic Act 9262 ug kalapasan sa Republic Act 7610 (Child Abuse). (BANAT NEWS)
- Latest
