Pangilinan mitingog batok sa post

CEBU, Philippines — Wala palabya ni Senador Kiko Pangilinan ang pamahayag ni Senador Ronald “Bato” Dela Rosa nga ang oposisyon partikular ang mga “Pinklawans” nagtan-aw lang karon sa mga nahitabo sa nasud ug nagplano kung unsay sunod buhaton aron mogawas nga sila maoy tarung human sa mga rebelasyon ni kanhi Ako Bicol party list representative Zaldy Co.

Ang pamahayag ni Pangilinan tubag niya ni sa gi post sa Facebook account nga Ronald Bato Dela Rosa niadtong Nobiyembre 15,2025 nga nag-ingon:

“Tahimik ang Pinklawans & Komunista sa expose ni Zaldy Co. Strategize muna sila how to appear righteous & anti-corruption kuno at the same time prevent the downfall of this gov’t from w/c they benifited a lot.”

Si Pangilinan miklaro nga wala sila nag-apas og personalidad o indibidwal kondili kung unsay mas makaayo sa nasud.

“Hindi kami nananahimik, nagmamasid kami at tinitimbang nang husto kung ano sa paniwala namin ang pinakamainam hindi para sa sinuman na nakaupo kundi para sa palagay namin ay ikabubuti ng bansa,” tubag ni Pangilinan sa Facebook post ni Dela Rosa.

Siya nidugang nga: “Responsibilidad namin tiyakin na may saysay ang ingay namin at mauuwi ito sa pagpapanagot sa mga nagkasala.”

Si Co suod nilang kanhi presidente Rodrigo Duterte kaniadto nga kagrupo ni Dela Rosa hangtud sa pagdaug sa ilang UniTeam nga tandem nilang Presidente Ferdinand Marcos Jr. ug Bise Presidente Sara Duterte, batok sa kandidatong gipaluyohan nilang Pangilinan nga si kanhi Bise Presidente Leni Robredo ug uban pa, apan karon ang maong alyansa sa UniTeam nabungkag na ug sila nay nag-unay.

Si Marcos mao ang mipublikar sa mga anomalya sa flood control projects atol sa iyang SONA ug mimando nga paimbestigaran tanang mga proyekto sulod sa nakalabay nga napulo ka tuig, apil ani ang kataposang tuig sa termino ni kanhi presidente Benigno P. Noy Aquino III, tibuok termino ni Duterte ug tulo ka tuig niyang (Marcos) termino.

Si Co kinsa gituohang nagtago-tago karon sa abroad nipagawas og video pinaagi sa social media nga namasangil kang PBBM ug Rep. Martin Romualdez nga nalambigit sa kontrobersiya sa P100B budget insertions.

Akusasyon nga gisalikway sa Malacañang ug gihagit kini nga mopauli ug pamatud-an iyang pamasangil.

Samtang si Mamayang Liberal party list Rep. Leila De Lima sa iyang bahin namahayag nga kinahanglang motestigo si Co “under oath” apan kinahanglan kining mopauli sa Pilipinas ug atubangon ang imbestigasyon imbes nga magbuhi og mga akusasyon gikan didto sa abroad.

"We urge former Rep. Zaldy Co to return to the country and fully cooperate with the ongoing investigation into the anomalous flood control and other infrastructure projects. He should take an oath and tell the whole truth before the proper forum," ni De Lima pa sa gipagawas niyang pamahayag niadtong adlaw nga Biyernes.

Bisan ang Office of the Ombudsman mipahinumdom kang Co kinahanglan niyang mopauli ug mopirma og pinanumpaang pamahayag bahin sa iyang pamasangil kay kung ipaagi lang niya kini sa social media, mosamot og kalangay ang imbestigasyon aron mapanubag ang tanang nalambigit sa kurapsyon.

"Every time a witness chooses the stage instead of the sworn desk, the investigation is forced to pause, to verify, to sift through what is said and what is left unsaid. And that is exactly why this process takes time," matud pa sa pamahayag sa Ombudsman niadtong November 15. — /IBM (BANAT NEWS)