Visayas Power Grid gikabalak-an nga huyang
CEBU, Philippines — Nanawagan karon ang Cebu Electricity Rights Advocates (CERA) sa mga lokal nga power distributors ug mga regulators nga mohimo og lig-on ug tukmang aksyon human sa sunod-sunod nga kalamidad nga mibutyag sa pagkahuyang sa Visayas power grid.
Si Nathaniel Chua, convenor sa CERA, miingon nga matag kalamidad nagpamatuod sa panginahanglan nga lig-onon ang katakus sa rehiyon sa pagmintinar sa tulo ka haligi sa usa ka malungtarong energy future: environmental sustainability, equity, ug security.
“Grid resilience is both a technological challenge and a matter of social justice. When the lights go out, we risk public health, disrupt local economies, and increase the cost of living,” matod ni Chua sa iyang press statement.
Nagpasidaan si Chua nga ang dili lig-on nga grid nagpaduol sa komunidad ngadto sa energy poverty. Ang dugay nga pagkawala sa kuryente nagpugos sa mga panimalay ug gagmay’ng negosyo sa paggamit og mahal nga generator sets, nga maka-ubos sa budget sa pamilya ug makadaut sa panginabuhi.
Gipasabot usab niya nga ang danyos sa imprastruktura ug ang paghunong sa operasyon sa pipila ka power plants nakapahinay sa supply ug nakapasaka sa presyo sa kuryente sa Wholesale Electricity Spot Market (WESM), nga katapusan nga mabati sa mga konsumidor pinaagi sa mas taas nga billing.
Nag-awhag ang CERA sa mga utility companies sama sa VECO, MECO, CEBECO I, II, ug III, ingon man sa Energy Regulatory Commission (ERC) ug sa Department of Energy (DOE), nga ipatuman ang klaro ug mahinungdanong mga reporma.
Apil niini ang pag-una sa critical circuits, pag-modernize ug decentralize sa grid, ug pagpatuman sa financial transparency aron maprotektahan ang konsumidor.
Gisuportahan usab sa CERA ang paghatag og temporary rate relief alang sa mga apektadong lifeline users, ug ang paggamit og measurable Service Level Agreements (SLAs) nga adunay klaro nga standards sa accountability. — /MEL (BANAT NEWS)
- Latest
