236 ka workers nakadawat og sweldo ubos sa TUPAD program

CEBU, Philippines — Mokabat sa 236 ka workers gikan sa Cebu People’s Multi-Purpose Cooperative and Amare Shell sa Mandaue City ang nakadawat sa ilang sweldo ubos sa Tulong Panghanapbuhay sa Ating Disadvantaged/Displaced Workers (TUPAD) program.

Kini human sa ilang deployment alang sa emergency cleanup operations human sa pag-igo sa bagyong Tino.

Lakip sa ilang gitrabaho mao ang paghawan sa mga debris, pagkuha sa mga naka-ali sa karsada ug nitabang alang sa pag-ayo sa mga pasilidad nga grabeng naapektuhan sa bagyo.

Ang payout gihimo sa DOLE-7 Tri-City Field Office ubos sa pagpangu sa Regional Director Atty. Roy L. Buenafe, nga nipasalig sa padayong pagsuporta sa ahensya sa mga nawad-an og trabaho ug pagpalambo sa mga komunidad.

Ang mga local officials ug community leaders nipadayag sa ilang pasalamat ngadto sa DOLE gumikan sa ilang dinalian nga pagtubag sa panginahanglan sa mga nawad-an og trabaho sa mga munisipalidad tibuok probinsiya sa Sugbo.

Samtang kagahapon sa buntag ang DOLE-7 nilusad sa usa ka kalihukan nga nagpakita og solidarity uban sa mga komunidad nga biktima sa bagyo nga mao ang “Pamahaw sa Pagtinabangay” diha sa Colorado Subdivision, sa Cotcot, Liloan.

Gipanguluhan ni Buenafe, kauban ang ubang DOLE-7 officials, ilang gidala ang mga personnel-volunteers aron molimpyo sa mga lugar nga grabeng naapektuhan sa pagbaha mugna sa bagyong Tino. Gikan sa The Freeman/MEL

Ang Cebu Caritas Inc gipangulohan ni Fr. Alex Cola. — /MEL (BANAT NEWS)