Climate justice, panawagan sa Greenpeace Philippines

CEBU, Philippines — Human ang Pilipinas nag-una sa ranking sa Climate ug World Climate Risk, nanawagan ang Greenpeace Philippines alang sa climate justice samtang ang mga Filipino nag-antos sa nagkagrabeng mga bagyo ug grabeng kadaut.

Ang nasud anaa sa ika-pito nga puwesto sa Germanwatch's Climate Risk Index1, ug sa makausa pa, nag-una sa World Risk Index2, diin nagpakita nga milyon-milyon nga katawhan ang nagpabiling anaa sa peligro gikan sa nagkagrabe nga mga bagyo, baha, ug uban pang mga peligro.

Matud sa Greenpeace Philippines kini nga ranking dakong pruweba nga ang mga Filipino maoy padayong nag-antos sa epekto sa polusyon apan ang gobyerno ug kadtong dako og natampo sa polusyon nakalikay sa tulubagon.

Base sa report sa duha ka risk index, ang high climate risk ranking sa nasud nunot sa dakong ihap sa mga tawo nga apektado ug dakong kadaot sa ekonomiya gikan sa grabeng panahon.

Gitaho niini nga tali sa 1995 ug 2024, ang Pilipinas nakatala og USD 35 bilyones nga dokumentado nga kadaot sa ekonomiya, apan ang maong kantidad wala gani maglakip sa dili ekonomikanhong kadaot nga giantos sa mga komunidad sa Pilipino sulod sa mga dekada— ang kasakit sa pagkawala sa usa ka minahal, panginabuhian, o sa umaabot. Ang Senior Campaigner sa Greenpeace Philippines nga si Virginia Benosa-Llorin miingon nga kada tuig nalang ang Pilipinas naa sa taas nga ranking sa global climate risk apan walay kausaban.

"Resilience has become the excuse for inaction. Our people have paid with their homes, their health, and their lives, while those most responsible for the crisis profit and pollute with impunity," matud ni Benosa-Llorin.

Samtang gipadayag ang makamatay nga mga epekto nga nasinati sa mga biktima nga unta malikayan kung ang bilyon-bilyong pondo para sa flood control ug proteksyon sa klima wala napunta sa korapsyon.

"The government should really be ashamed due to its lack of action amid a huge corruption scandal," dugang pa niya.

Nunot niini, nanawagan siya sa mga adunahang nasud nga atol sa ika-30 nga Conference of the Parties (COP30) ubos sa UN Framework Convention on Climate Change (UNFCCC), pun-on ang Loss and Damage Fund gamit ang grant nga direkta moabot sa mga komunidad; pabayron ang mga major polluters ug; angay unahon sa gobyerno sa Pilipinas ang CLIMA Bill aron paninglan ang mga polluters, protektahan ug i-audit ang pondo sa klima ug flood control, ug paspasan ang community-led resilience. — /MEL (BANAT NEWS)