Sweldo sa casuals senimana na

CEBU, Philippines — Matag semana na nga makakobra og sweldo ang 2,006 ka casual employees sa Kagamhanan sa Dakbayan sa Sugbo human giaprobahan sa Konseho ang Memo No. 2025-00793 niadtong Nobyembre 11, 2025.

Si Henry Tomalabcad, hepe sa Human Resource Development Office (HRDO), miingon nga dugay na nilang nahunahunaan ang inisyatiba nga senimana ang pagpagawas sa sweldo.

Apan karon lamang kini naaprubahan sa administrasyon ni Mayor Nestor Archival pinaagi sa resolusyon nga giduso ni Konsehal Sisinio “Bebs” Andales.

Dugang pa niya, ang Dakbayan sa Sugbo mao ang unang lokal nga kagamhanan nga nagpatuman niining senimanang sweldo alang sa regular ug casual nga mga empleyado.

Naandan sa mga casual nga mga empleyado nga kaduha ra sila makadawat og sweldo matag bulan.

Apan base sa kasayuran nga nakuha sa HRDO, daghan sa ilang empleyado ang napuno sa utang tungod sa kanunay nga pagpundo sa ilang sweldo.

“Maayo nalang nga makatabang-tabang kini sa atong mga empleyado aron maibanan ang ilang mga utang. General knowledge naman nga kadaghanan sa atong casual employees napuno og utang, mao kinahanglan natong hatagan og pagtagad,” matud pa ni Tomalabcad.

Sa wala pa giduso ang resolusyon, gisiguro ni Tomalabcad ug ni HRDO Supervising Administrative Officer Antonio Abella Jr. nga ang implementasyon niini dili makalapas sa mga probisyon sa Department of Budget and Management (DBM) ug Civil Service Commission (CSC).

Gikalipay usab ni Tomalabcad ang suporta sa bag-ong administrasyon, ug daghan sa mga casual employees ang nalipay sa dihang misulod na ang ilang sweldo sa ilang ATM accounts kagahapon, Nobiyembre 14.

Ang adlaw nga Biyernes napili isip schedule sa paghatag sa sweldo alang sa regular ug casual employees, apan dili pa apil niini ang job order nga mga empleyado. IBM BANAT NEWS