Quarry operations sa Talisay gitinguhang ipahunong

CEBU, Philippines — Nagtinguha ang konseho sa Dakbayan sa Talisay sa pagpahunong na sa tanang operasyon sa quarry sa siyudad.

Si Konsehal Alito Bacaltos, chairman sa committee on environment ang niduso og resolusyon nga naghangyo ni Gobernador Pamela Baricuatro sa dinalian nga paghunong ug paglibkas sa tanang quarry operation sa Dakbayan sa Talisay. Base sa resolusyon ni Bacaltos nga ang operasyon sa quarry nakapaguba sa kalikupan ug nakapeligro sa mga Talisaynon. “A Resolution urging the Cebu Provincial Government for the immediate stoppage and revocation of permits of all quarry operations in the City of Talisay, Cebu, which have caused irreparable damage to the environment and have imminently endangered the lives of the Talisaynons”, tipik sa resolusyon ni Bacaltos.

Gipasabot ni Bacaltos nga ang pagkuha sa permit sa mga quarry operations adto mag-agi sa Provincial Environment and Natural Resources Office (PENRO), Department of Environment and Natural Resources (DENR) dayon sa opisina sa gobernador. Matudni Bacaltos nga dili makahilabot ang Talisay kong ang pribado nga kompaniya makakuha na og permiso sa nahisgutang mga ahensiya sa gobiyerno.

Nagkanayon ang konsehal nga dili mahimo nga mapadaplin ang problema ug dili usab karon ang oras sa pagtinudloay kinsa ang sayop.

Si Bacaltos nagkanayon nga dili lang Talisay maoy naigo sa pagbaha apan mas maayo nga mo aksyon dayon sa nakit-an nga nakatampo sa suliran.

Ang labing ulahing talaan nila ni Bacaltos nga apektado sa baha pag-igo sa bagyong Tino niabot na kini sa 23,000 nga naglangkub sa 4,300 ka totally damaged ug 19,000 ka partially damaged nga panimalay.

Gibutyag ni Bacaltos nga seryoso sila sa pagpaabot sa resolusyon bisan pa kong adunay maligsan nga negosyo. Gipadayag ni Bacaltos nga mabuhi ang ekonomiya sa operasyon sa quarry apan kinahanglan usab kini nga balansehon nga dili mameligro ang kadaghanan.

Nanghinaot si Bacaltos nga unta adunay ipahigayon nga Inter-LGU Watershed Summit aron mapatawag ang mga lider ug mahisgotan ang angay nga pagabuhaton pagpreserba o pagprotekta sa kalikupan.

Naglaom si Bacaltos nga makakuha sila og positibo nga tubag sa ilang resolusyon ngadto sa gobernador. BBD BANAT NEWS