Enrile nitaliwan sa edad nga 101

CEBU, Philippines — Nitaliwan na ang beterano ug usa sa labing pinakadako og nahimong papel ug kontrobersiya sa kasaysayan sa politika sa Pilipinas nga si kanhi senador Juan Ponce Enrile, kagahapon, Nobiyembre 13,2025 sa edad nga 101.

Gikumpirmar kini sa iyahang anak nga si Katrina Ponce Enrile pinaagi sa iyahang Facebook post.  Ang kanhi senador gi-confine sa intensive care unit tungod sa pneumonia sa usa ka tambalanan.

"It is with profound love and gratitude that my father, Juan Ponce Enrile, peacefully returned to his Creator on November 13, 2025, at 4:21 p.m., surrounded by our family in the comfort of our home," matud pa niya.

Matud pang Katrina gibubo sa iyang amahan ang tibuok kinabuhi alang sa serbisyo publiko. Nihangyo siya sa publiko nga sabton ang ilang sitwasyon karon sa panahon sa ilang pagbangutan sa pribadong paagi.

Atol sa Senate plenary session niadtong Martes, November 11, si Sen. Jinggoy Estrada, kinsa kauban ni Enrile sa kaso sa pork barrel scam, nga duna siyay kasaligang source nga ang kanhi Senate president naa sa kritikal nga kondisyon.

Natawo si Enrile, atol sa Valentine's Day niadtong 1924. Halos tanang presidente sa Pilipinas iyahang naagian.

Usa sa iyang legasiya mao ang pagbutang sa gahum sa duha ka mga Marcos, gikan sa diktador nga kanhi presidente Ferdinand Marcos Sr. hangtud sa anak nga kasamtangang presidente, Marcos Jr.

Daghan siyang gihuptang posisyon sa gobiyerno ug usa niini mao ang pagkahimong defense secretary sa panahon ni Marcos Sr.

Usa sa kontrobersiya sa panahong siya pay defense minister nahitabo niadtong 1972 nga matud pa pagpakaaron-ingnong biktima sa ambush nga maoy nahimong usa sa  rason sa diktador pagdeklarar og martial law.

Apan instrumento sab siya sa pagpalagpot sa diktador kauban si kaniadto AFP Chief ug kanhi presidente Fidel V. Ramos.  Nabalik sab siya isip defense chief ubos sa bagitong administrasyon ni anhing presidente Corazon Aquino, dayun nisulod siya sa politika ug kaduha nahimong Senate president.  Naakusahan og duha mga kontrobersiya sa kurapsyon bahin sa pork barrel scam o Priority Development Assistance Funds.

Tungod sa kataas sa iyang eksperiyensiya sa politika sa Pilipinas bisan usa siya sa nakaingon sa pagpalagpot sa diktador, gikuha siyang chief presidential legal counsel ni Presidente Ferdinand Marcos Jr. niadtong 2022.

Ang kinabuhi ni Enrile maisip nga usa sa mga klasikong ehemplo kun unsa ang gitawag nga “power plays” sa politika.— Gikan sa Philstar.com/IBM BANAT NEWS