1 patay, 13 angol sa bangga

CEBU, Philippines —  Usa ang patay, samtang 13 ka mga tawo ang naangol sa duha ka mga aksidente sa kadalanan niadtong Lunes.

Sa Cebu City, patay ang 18-anyos nga lalake human nabangga ang gimanehong motorsiklo sa traffic signage ug nalagpot ug naigo sa nagpadulong nga sakyanan diha sa Natalio Bacalso Avenue, Barangay Bulacao, Siyudad sa Sugbo niadtong Lunes sa gabii, November 10, 2025.

Ang namatay  nagmaneho og Honda PCX160, taga V. Rama, Quijano Compound, Barangay Calamba ug samtang driver sa Suzuki van nga diin siya nalagpot usa ka 33 anyos nga taga Barangay Quiot, Cebu City.

Sa imbestigasyon sa Traffic Enforcement Unit Cebu City Police Office(CCPO) base sa kuha sa dash camera footage sa Suzuki Van nakita nga ang motorsiklo nagbiyahe sa Natalio Bacalso Avenue paingon sa dakbayan sa Talisay. Samtang ang Suzuki Van nagbiyahe sa opposite direction ug pareho silang nag-okupar sa inner lane.

Pag-abot sa lugar giingong kusog kaayo og dagan ang motorsiklo nga ni-overtake sa left side sa van bisan og solid yellow-line apan nabangga kini sa u-turn signage.

Gumikan sa impact ang motorsiklo nalabay sa pikas lane ug nabangga sa atubangan nga bahin sa Suzuki van.

Namatay ang biktima sa Cebu City Medical Center apan nakabsan gyud kini sa kinabuhi.

Naangol sab ang 13 ka mga tawo human sa nahitabong panagbangga sa usa ka hi-ace van ug taxi sa National Highway, Sitio Humayan, Barangay Pangdan, dakbayan sa Naga niadtong November 10, 2025.

Ang mga sakyanan nga nalambigit kay Toyota Hi-Ace Grandia color white nga gimaneho ni Alberto Borbon Antiligando, 42, nagpuyo sa Barangay Banilad, Cebu City.

Sakay niya ang mga madre nga sila si Sisters Yolanda Narciso Navea, 82 anyos, Vice Chairman sa Consolatrix College, Poblacion Toledo City; Adelina Madrigal Reyes, 72 anyos, College Registrar; Yvette Tadena Galabo, 51 anyos, Treasurer; ug magtutudlo nga si Mary Jane Jardin, 36.

Samtang ang ilang nakabangga mao ang Toyota Innova, OGRE's Taxi color black nga gimaneho ni Christopher Iglesia Macalinao, 44, taga Lamac, Lungsod sa Pinamungajan.

Duna kini mga pasahero nga sila si Reymark Alfara Ubas, 18; Isidra Alfara Sebuco, 62; Roberto Besera Cantila, 59; Jerson Gentiloro Sebuco, 23; Victor Quijano Resit, 44; Renz Panugaling Gonzalez, 19; ug Gelardo Panton Sebuco, 66, pulos mga taga Lamac, Pinamungajan.

Base sa inisyal nga imbestigasyon sa City of Naga Police Station nga ang duha ka sakyanan nagbiyahe sa managlahi nga direksyon.

Ang van gikan sa Cebu City ug paingon sa Toledo City samtang ang taxi gikan sa gikan sa Lungsod sa Pinamungajan ug padong sa Cebu City.

Pag-abot sa naasoy nga dapit ang taxi giingong nitipas sa iyang lane ug nilapas sa lane sa van hinungdan sa panagsungag sa duha ug nangaangol ang tanang mga sakay sa duha. (BANAT NEWS)