Hose sa water pump gituyoan og gisi?

CEBU, Philippines —  Nagtuo ang mga sakop sa Talisay City Disaster Risk Reduction and Management Office nga gituyoan sa paggisi ang hose sa water pump nga gibutang diha sa Purok Madasigon, Barangay Biasong, Dakbayan sa Talisay.

Si Joel Sisa, operations head sa CDRRMO nibutyag nga limpiyo kaayo ang pagkagisi nga posibleng gigamitan og hait nga butang.

Matud ni Sisa nga dili yanong magisi ang hose tungod kay heavy duty kini bisan pa og masaghid kini og bato samtang nagpasuyop og tubig. Nagkanayon si Sisa nga gibutang nila sa priority ang lugar tungod kay pila ka adlaw na nga wala pa gyud nihubas ang tubig. Gibana-bana ngaa naa sa 100 metros ang gilay-on niini gikan sa highway ug dili mayano og sulod sa sakyanan.

Ang ilang gibuhat gitukmod nila og mano-mano ang waterpump hangtud nga naabot sa gibahaan.

Gipadayag ni Sisa nga nakasugod na gyud sila og pasuyop sa tubig baha niadtong Lunes. Ug gumikan sa kadaghan sa tubig dili mahuman sa usa ka adlaw ang pagtrabaho hinungdan nga ilang gitugyan ang water pump ug ang hose ngadto sa konsehal sa barangay.

Apan pagbalik nila niadtong Martes ilang nakita nga gisi na ang hose niini hinungdan sa pagkalangan sa ilang pagpasuyop sa tubig baha. Matud usab ni Sisa nga ang panghitabo naabot na sa buhatan ni Atty. Rudelyn Navarro, city administrator sa siyudad. Ug ilang ipa-blotter ang panghitabo aron masusi kong aduna ba’y manubag sa maong insidente.

Sa laing bahin, ayohon dayon ang mga seawall sa nagkadaiyang barangay sa Dakbayan sa Talisay nga nangaguba atol sa kalit nga pagkusog sa bawod sa niaging adlaw. Kini maoy gipahibawo ni Talisay City Mayor Gerald Anthony “Samsam” Gullas, Jr..

Gibutyag ni Gullas nga gisusi na sa taga engineering ang mga naguba nga seawall sa mga barangay sa Poblacion, Dumlog ug Tanke.

Ug kong molurang na ang dagkong bawod sugdan dayon ang pag-rehabilitate sa seawall.

Nasayran nga taob ang dagat niadtong Domingo sa gabii ug ang hangin maoy nakapakusog sa bawod nga nagsige og balik-balik sa paghapak sa seawall.

Naguba ang seawall sa Sea Lights sa Barangay Dumlog, Sitio Litmon, Sitio Kalubihan ug Asan sa Barangay Poblacion ingon man sa Barangay Tanke.

Ang mga residente sa dapit namakwit human nisaka ang tubig sa dagat sa ilang panimalay ug ang uban nangaguba pa.