Drainage masterplan gitinguha nga mapadayon

CEBU, Philippines — Giduso karon ni Bise Gobernador Glenn Anthony Soco nga mapadayon na ang Metro Cebu Flood and Drainage System Master Plan, usa ka proyekto nga nagtinguha nga dili na mabahaan ang Sugbo.

Sakop sa proyekto ang Carcar hangtod sa dakbayan sa Danao diin nakalatid sa maong master plan ang mga gikinahanglan nga himoon aron madumala ang baha ug giipaabot nga paglambo pa sa urban areas ug pag-andam sa climate change.

Ang maong masterplan gipreparar sa Department of Public Works and Highways (DPWH) ug sa JICA.

Sumala sa bise gobernador, iyang nasayran ang maong plano niadtong 2017 samtang siya pa ang presidente sa Mandaue Chamber of Commerce and Industry, diin nahimo siya nga kabahin sa tigom sa DPWH ug ubang mga national agencies nga naghisgut sa long term solution sa pagbaha.

Sa dihang nahimo siya nga chairman sa Infrastructure Committee sa Regional Development Council sa Central Visayas (RDC-7), ang maong plano giendorso ug giaprobahan sa council aron mahatagan og pondo sa nasudnong kagamhanan.

Niadtong 2018, ang maong plano nakadawat og P700 million nga pondo; pag 2019 dugang P1.2 billion na sab nga maoy gigamit sa pagpalapad ug pagpalambo sa Subangdaku, Tipolo ug duha ka sapa sa dakbayan sa Sugbo.

Apan human niadto wala nay nahitabo, gihunong na ang pagpondo sa proyekto ug gi abandonar na ang maong plano.

Matod ni Soco nga ang mga nisunod mao ang mga uncoordinated na nga mga proyekto sa mga sayop nga lugar, diin ang uban substandard ug inconsistent sa maong masterplan.

Dugang pa niya nga sama sa ubang Sugboanon, siya nasagmuyo ug naglagot kon adunay baha nga mahitabo, ilabina sa nahitabong lunop atol sa pangusokuso sa bagyong Tino.

Sulod sa niaging mga tuig iyang giduso ang maong masterplan tungod sa pagtoo nga kini ang makasulbad sa problema sa baha sa Sugbo, apan tungod kay wala kini madayon, nagpadayon ang maong problema.

Matod ni Soco, naandan na ang pagpanghatag og relief goods ug pagdeklarar og state of calamity isip kabahin sa serbisyo publiko, apan kini dili panerbisyo, kon dili reaksyon lang.

Sumala sa bise gobernador ang mga tawo dili kinahanglan og photo ops, kon dili resulta ug pagpanalipod gikan sa gobyerno.

Niawhag si Soco sa mga kauban niini nga public servant nga suportahan ang maong plano.

Usa na ang paghimo og ordinansahon sa pagrequire sa mga developers sa probinsiya nga iapil ang rainwater catchment facilities sa ilang mga proyekto.

Gidapit usab niya ang DPWH ug and DepDeV nga hatagan og update ang mga bokal sa kon asa na karon ang maong plano ug kon unsay sunod nga aksyon niini.

Sa katapusan, ang bise gobernador niawhag nga kinahanglan gyud manubag kadtong mga nakapahimulos sa mga substandard ug anomalosong flood control projects.

Sumala sa bise gobernador nga dapat dili ra kutob sa pagrebuild sa mga sayop na daan nga gitukod ang himoon, ug dili sab mamahimo nga kanunay ra mosulbad sa sintomas samtang gisalikway ang hinongdan sa problema. (BANAT NEWS)