Duha nakalas sa super typhoon Uwan

CEBU, Philippines — Duha ang namatay ug duha ang nasamdan sa pangusokuso sa Super Typhoon Uwan o Fung-wong didto sa Luzon, sumala sa National Disaster Risk Reduction and Management Council (NDRRMC).

Hinuon padayun pa ang beripikasyon sa maong ahensiya sa mga nakalas dungan sa paghimo nila og assessment sa mga apektadong lugar.

Usa sa mga namatay taga Viga, Catanduanes nga nalumos, samtang ang usa gikan sa Catbalogan City human natabunan sa nag-collapse nga estruktura.

Ang duha ka samaran gikan sab sa Bicol Region ug Western Visayas, ug wala’y gi-report nga missing persons.

Mitugpa ang bagyong Uwan sa eastern Luzon niadtong Domingo sa gabii, nga nakaaghat sa gobiyerno pagmando og preemptive evacuation sa mga komunidad.

Kapin 1.27 milyones ka residente ang gipabiya gikan sa coastal ug landslide-prone nga mga lugar sa lain-laing rehiyon nga giisip nga maoy pinakadakong evacuation operation nga natala karong tuiga.

Sa inisyal nga datos, 966 ka balay ang nadanyos ug 78 ang hingpit nga naguba sa bagyo.

Daghang lugar ang nawad-an og suplay sa kuryente tungod sa natumba nga mga poste ug nangatagak nga mga kahoy.

Nagpadayon pa ang validation sa mga report sa kadaut sa mga kalsada, tulay, eskwelahan, ug ubang pampublikong imprastruktura.

Gilauman sab ang kadaut sa agrikultura sa umaabot nga mga adlaw, ilabi na sa tanom nga humay ug lubi, sumala sa NDRRMC. (BANAT NEWS)