Teodoro nimando kagahapon sa preemptive evacuation

CEBU, Philippines — Samtang ang super typhoon Uwan  padulong sa landmass sa Pilipinas, si Defense Secretary ug National Disaster Risk Reduction Management Council Chairman Gilberto Teodoro, Jr. niisyu og hugtanong apela kagahapon alang sa preemptive evacuation sa mga high-risk nga lugar ug nagpasidaan kini nga ang pagdumili sa pagsunod mahimong moresulta sa pinugos nga pagpabakwit ubos sa balaod.

Ang maong panawagan giluwatan samtang ang Department of the Interior and Local Government (DILG) nimando sa tanang local government units lakip ang Cebu City sa pag-activate sa emergency protocols ug pag-andam sa epekto sa bagyo.

“Marami po kaming natanggap na reports na hinihikayat ang ating mga kababayan na mag-preventive evacuation at marami po ang ayaw sumunod”, matud ni Teodoro  atol sa briefing nga gi-aired live sa Office of the Civil Defense.

“Kaya magkakaroon ng forced evacuation sa mga lugar na kakayanin pa”, gihatagan niya og gibug-aton nga ang pagbakwit dili lamang usa ka proteksiyon nga lakang alang sa mga sibilyan apan panalipod usab kini alang sa mga first responder.

“Pag huli po humingi tayo ng rescue, nalalagay sa panganib ang buhay ng ating mga kapulisan, sundalo, bombero at ang Coast Guard natin”, padayag ni Teodoro.

Gipahinumdoman ni Teodoro ang publiko nga ang pagsupak sa balaod nga mga mando sa panahon sa gideklara nga forced evacuation mahimong usa ka paglapas sa balaod.

“Ayaw po nating umabot sa ganun dahil buhay po ang ating pinagtatanggol dito”, matud ni Teodoro kinsa niawhag sa mga residente nga mobakwit na ngadto sa mga evacuation centers aron malikayan ang risgo o pagkakalas sa kinabuhi.

Sa hiniusang advisory, gisubli sa DILG ug Philippine National Police nga ang pagluwas sa kinabuhi mao ang nag-unang proyoridad.

Ang mga lokal nga opisyal gimandoan sa pagpangulo sa mga evacuation gamit ang tanang paagi sa pagdani sa dili pa ipatuman ang mandatory evacuation ubos sa Akta Republika No. 10121 kun “Local Government Code”.

Sa Dakbayan sa Sugbo, diin nagpabilin pa ang epekto sa bagyong Tino, gi-activate sa city government ang Emergency Operations Center (EOC) niini subay sa direktiba ni DILG Undersecretary Marlo Iringan.

Ang kamandoan gipaabot pinaagi sa DILG Cebu City Field Office, nagmandato sa dinaliang pagpatuman sa mga protocol sa Operation LISTO ug ang pagpatawag sa City Disaster Risk Reduction and Management Council alang sa Pre-Disaster Risk Assessment.

Gikompirmar sa city hall nga gipalihok na ang mga barangay DRRMCs alang sa 24/7 nga pag-monitor sa landslide ug flood-prone zones uban ang preemptive evacuations sa high-risk coastal, riverine, ug upland areas nga mahuman kagahapon.

Ang mga evacuation center giandam uban ang mga stockpile, sanitation facilities ug mga backup power system sa kuryente subay sa mga sumbanan sa CCCM.

Ang mga residente sa Dakbayan sa Sugbo giawhag nga magbinantayon ug alerto ilabi na sa mga lupa ug bukirang lugar nga delikado sab aha ug pagdahili sa yuta. — The Freeman