Pam: Hain na ang master plan?

CEBU, Philippines —  Buot karon ni Gobernador Pamela Baricuatro masayran kun unsay nahitabo sa Metro Cebu Integrated Flood Control and Drainage Master Plan nga maoy unta usa sa mga dagkong proyekto sa Sugbo batok sa    baha.

Ang gobernador, sa iyang Facebook post kagahapong adlawa nagkanayon nga mapugngan unta ang grabeng pagbaha kun napatuman ang maong proyekto nga matud sa gobernador naaprobahan na unta sa niaging mga tuig.

"What happened to the Metro Cebu Integrated Flood Control and Drainage Master Plan? It was approved years ago with a clear promise to safeguard Cebu from disaster. If it was not executed, we must know why?" pangutana sa gobernador.

Apil kini sa iyang nahisgotan kauban ni Presidente Bongbong Marcos Jr., ug DPWH Secretary Vince Dizon ug mga mayor sa Sugbo atol sa pagduaw niini niadtong adlaw nga Biyernes sa Sugbu.

"We will work with partners in the national government and the private sector to ensure urgent action and long-term resilience," dugang ni Baricuatro.

Iya pud giawhag ang mga Sugboanon nga dili kalimtan ang kapalpakan sa mga opisyal kaniadto sa Sugbo nga matud pa niya maoy responsable niining tanan ug angay nga manubag.

NAKALAS

Samtang, dili momenus 109 na ang natala nga patay sa bagyong Tino lukop Probinsya sa Sugbo samtang 66 pa ang missing ug 311 ang naangol base sa alas-10  sa buntag nga situational report sa Provincial Disaster Risk Reduction and Management Office (CPDRRMO) kagahapong adlawa, Nobiyembre 8.

Ang gidaghanon pud sa mga namatay sa matag LGU nag-usab usab, base sa latest report sanglit ang uban nga na-identify, nasayran nga sa taga laing lungsod diay nga residente.

Sa datus sa CPDRMO, 31 ang patay sa lungsod sa Compostela, 60 ang naangol ug 43 pa ang  missing.

Sa Consolacion, walay natala nga namatay human nga na update sa DILG, ang natala nga namatay sa lungsod ug nasuta nga mga residente sila sa dakbayan sa Mandaue.

Samtang ang Mandaue, 15 na karon ang patay, dugang sa usa nga unang natala sa Consolacion. Usa pud ang missing sa maong dakbayan.

Ang Danao, 9 ang namatay ug usa ang missing.  Sa Talisay, pito ang nakalas nga kinabuhi ug 6 ang naangol.  Ang Bantayan ug Tabogon, parehong nakatala og tagsa ka casualty.

Sa Asturias, duha ang patay, upat ang missing. Sa Liloan, 31 ang patay, 126 ang naangol ug upat ang missing. Sa Balamban, 11 na ang natala nga casualty, 119 ang naangol ug 14 na missing.

Sa susamang report, 66, 428 ka mga pamilya o 219, 296 ka mga indibidwal ang napabakwit sa 40 ka LGUs nga apektado sa bagyo.

Sa pagbalik sa kuryente, ang VECO mitaho nga halos tanan nga lugar nga sakop niini ang hapit na ma 100% nga balik ang kuryente.

Samtang sa mga LGUs nga sakop sa CEBECO II, ana pa sa 48.60% gikan sa 321 ka mga barangay ang nabalik ang kuryente. (BANAT  NEWS)