Gullas nipadayag sa iyang kaguol

CEBU, Philippines — Si Talisay City Mayor Gerald Anthony “Samsam” Gullas, Jr. nipadayag nga nagpatong-patong ang iyang kaguol karon gumikan sa nahitabo sa Dakbayan sa Talisay.

Ug niadtong Huwebes sa buntag nitaliwan na ngadto sa laing kalibutan ang iyang apohan nga si kanhi Talisay City mayor ug kongresista Eduardo Gullas. Nagkanayon si Gullas nga ang kasakit nga iyang gibati nagpatong-patong gikan sa nahitabo sa Talisay nga daghan ang apektado sa bagyong Tino ug karon mao usab ang pagkawala sa iyang apohan. “Grabe akong dughan gikumot sa kasakit unya karon gipun-an pa sa pagkawala ni Papa Eddie”, padayag ni Gullas. Si Eddigul nahimong gobernador sa Sugbo ug kapila usab kahigayon nga niserbisyo isip kongresista sa unang distrito ug mayor sa Dakbayan sa Talisay.

Ang iyang haya anaa sa Crystal Palace, Barangay Lahug, Dakbayan sa Sugbo ug sa alas 8:00 matag gabii adunay ipahigayong misa.

Ang lubong ni Eddigul gikatakda karong Nobyembre 11, 2025 adlaw nga Martes. (BANAT NEWS)