Eddiegul nitaliwan na sa edad nga 95-anyos

CEBU, Philippines — Nitaliwan na ngadto sa laing kalibutan kagahapon sa buntag ang usa sa mga dakong tawo sa Sugbo Eduardo “Eddiegul” Gullas.

Gikompirma kini sa iyang bugtong anak nga si Gerald Anthony “Didi”, Sr. pinaagi sa iyang ig-agaw nga si John Vicente Gullas, vice chairman sa The Freeman ug Banat News.

Nasayran nga si Eddiegul na tawo niadtong Okubre 13, 1930 ug nagpangedaron na kini og 95-anyos.

Ug gibutyag sa iyang anak nga septic shock pneumonia acute respiratory failure ang hinungdan sa pagkabugto sa iyang kinabuhi kagahapon sayo sa buntag diha sa usa mga tambalanan sa Dakbayan Sugbo ug uban niya niadtong higayona ang iyang mga sakop sa pamilya.

Ang haya ni Eddigul gipahimutang diha sa Crystal Palace Cosmopolitan Funeral Homes, Barangay Lahug, Dakbayan sa Sugbo.

Si Eddigul anak kini nila ni kanhi Vicente Gullas, founder sa Visayan Institute nga karon University of the Visayas (UV) ug Josefina “Pining” Rivera.

Usa ka abogado ug educator ug nilingkon usab si Eddigul isip presidente sa UV.

Si Eddigul, kanhi pangulo sa Alayon Party nilingkod kini isip kongresista sulod sa pito ka termino sa unang distrito sa Probinsiya sa Sugbo gikan sa tuig 1992 ngadto sa 2001, 2004 ngadto sa 2013; ug gikan 2019 ngadto sa 2022 diin kaalyado kini sa Nacionalista ug One Cebu Party. 

Gitudlo isip gobernador sa Sugbo ni kanhi Presidente Ferdinand Marcos, Sr. gikan sa 1976 ngadto sa 1986.

Nilingkod isip mayor sa Dakbayan sa Talisay niadtong 2001 ngadto sa 2004; 2016 ngadto sa 2019.

Si Eddigul mao ang amahan sa pagkahimong siyudad sa Talisay niadtong Enero 12, 2001 ubos sa Akta Republika 8979 ug siya usab ang principal author sa maong balaod dihang nilingkod pa siya isip kongresista.

Siya usab ang founder sa Talisay City College ubos sa iyang termino isip mayor sa siyudad niadtong tuig 2004.

Ubay-ubay na ang mga Talisaynong kabus ang nakalampos sa ilang pagtungha sa kolehiyo ug nakasulod sa lain-laing mga kompaniya ug nakatabang sa ilang pamilya aron mahaw-as sa kalisod gumikan sa libreng edukasyon nga gitanyag sa TCC. (BANAT NEWS)