DPS padayon sa ilang clearing operation sa siyudad sa Sugbo

CEBU, Philippines — Padayon ang clearing operation nga gihimo karon sa Department of Public Services (DPS) sa Cebu City human sa kadaot nga gidala sa bagyong Tino.

Sumala sa DPS head nga si Paul Gelasque, nakaabante na ang ilang team sa operasyon apan daghan pa gihapon ang angayan nga trabahoon.

Giuna sa operasyon ang pagkuha sa basura, gisundan sa mga sanga ug debris, ug pagkahuman ang pagkuha sa lapok.

Sa higayon nga adunay agas na sa tubig, una pa nila himoon ang flushing o pagbanlas aron masiguro nga limpyo ang mga karsada.

Sa pagkakaron, kapin 100 ka empleyado sa garbage collection ug 200 ka street cleaners ang gideploy sa nagkalain-laing parte sa siyudad.

Bisan pa niini, dili pa makompleto ang mga staff nga gikinahanglan tungod kay pipila sa mga trabahante naapektuhan usab sa bagyo. Ang uban kanila nabahaan ug naguba ang balay mao nga dili mapugos silang tanan nga mag-duty.

Nangayo si Gelasque og tulo hangtod lima ka adlaw nga extension gikan sa mayor aron makompleto ang pagpanglimpyo sa siyudad.

Daghan pa ang basura ug debris nga kinahanglan tangtangon tungod sa grabe nga kadaot nga namugna sa bagyo.

Gigamit sa operasyon ang mga garbage trucks, free loaders, ug ubang heavy equipment alang sa pagkuha sa yuta ug debris. Apan mas maayo kung daghan pa ang makapahulam og ekipo aron dali ang pag-trabaho kay kasagaran ang gigamit gikan sa City Hall.

“The city government is open for help. Mas maayo magtinabangay ta para mas dali atong trabaho. So katong mga private individual o mga private entities nga ganahan mutabang og pagpanglimpyo sa atoang kadalanan para madali, please coordinate with me,” matud ni Gelasque. MEL BANAT NEWS