VECO nipahimangno nga posibleng dunay power interruption

CEBU, Philippines — Nagpahimangno ang Visayan Electric Company (VECO) nga posibleng adunay temporaryong pagputol sa suplay sa kuryente kung kinahanglan aron maprotektahan ang ilang distribution system atol sa pag-igo sa Bagyong “Tino.”

Sa usa ka service advisory nga gipagawas sa kompaniya, giingon nga ipabilin nila ang kuryente hangtod nga luwas pa kini buhaton, apan mahimong ipahunong ang serbisyo kung kinahanglan alang sa kaluwasan ug aron mas paspas ang pag-ayo human sa bagyo.

Gipasalamatan sa VECO ang publiko sa pagsabot ug gidasig ang tanan nga magpabilin sa sulod sa balay ug mag-amping samtang nag-ulan ug kusog ang hangin.

Ang pahimangno gipagawas samtang gipaabot sa Philippine Atmospheric, Geophysical and Astronomical Services Administration (PAGASA) ang paglig-on sa Bagyong “Tino,” nga posibleng magdala og kusog nga ulan ug hangin sa mga lugar nga giserbisyohan sa VECO. (BANAT NEWS)