Pangalan sa TCH ilisan

CEBU, Philippines — Usa ka ordinansahon ang gisang-at ni Konsehal Alvin Arcilla ngadto sa konseho sa Dakbayan sa Sugbo nga nagtinguhang ilisan ang pangalan sa Transcentral Highway sulod sa hurisdiksiyon sa syudad ngadto sa “Lito Osmeña Transcentral Highway.”

Agi kini og pagpasidungog sa yutang natawhan sa kanhi gobernador sa Sugbo nga si Lito Osmeña tungod sa iyang dakong kontribusyon sa kalamboan ug imprastraktura sa probinsya.

Giila sab ang mga mahinungdanon gibuhat ni Osmeña sa pagplano, pagpalambo, ug pagtukod sa Transcentral Highway kun diin usa kini ka historikal nga proyekto sa kalsada nga nagdugtong sa siyudad ngadto sa nagkadaiyang mga lungsod ug munisipalidad sa Sugbo.

“The former Governor Lito Osmeña’s leadership and vision for the development of infrastructure in Cebu paved the way for improved connectivity, better governance, and a more prosperous region,” sumala pa sa ordinansahon ni Arcilla. Ang ordinansahon gipaubos na sab kini sa pagsusi sa Committee on Laws, Ordinances, and Styling nga gipangulohan ni Konsehal Mikel F. Rama ug nasuta nga nakatuman kini sa mga rekisitos sa Republic Act 7160 o Local Government Code.

Girekomenda usab sa komitiba nga kinahanglan nga mangayo ni Arcilla og konsultasyon sa National Historical Commission of the Philippines (NHCP) aron nga maaprubahan ang mga ordinansa tungod kay ang Transcentral Highway usa kini ka publikong lugar.

Sa higayon nga maaprubahan, ang bag-ong ngalan gamiton sa tanang opisyal nga mga signage, mapa, ug dokumento nga nagtumong sa kalsada.

Gipasabot usab nga ang syudad maoy manguna sa pagbutang sa mga bagong karatula nga magpakita sa bag-ong ngalan niini.  IBM BANAT NEWS