Kapitolyo mopalit og nagkadaiyang bakuna
CEBU, Philippines — Nagplano ang Probinsiya sa Sugbo nga mopalit og nagkadaiyang bakuna ug medical supplies aron mapahingosgan pa ang public health response ug kaandam sa probinsiya abatok sa sakit.
Apil sa paliton sa Kapitolyo ang flu ug pneumococcal vaccines alang sa paglikay sa severe case sa pneumonia, partikular sa mga residente sa northern Cebu nga apektado sa linog diin hangtud karon anaa pa gihapon sa tent cities ug sa temporary shelters.
Matud ni Dr. Nikki Catalan, Capitol health consultant nga adunay posibilidad nga magtinakdanay sa sakit ang mga tawo diha sa lugar hilabina kadtong anaa sa tent cities. Si Catalan nagkanayon nga ang pagpamakuna nga himuon iprayoridad ang mga senior citizen nga maoy pinakarisgo sa severe o grabe nga sakit o pagkalas sa kinabuhi tungod sa pneumonia.
Gitinguha sa Kapitolyo nga mabakunahan ang 10 porsyento sa mga vulnerable nga populasyon aron makahimo og herd immunity ug makatabang nga dili na mokatap ang impeksiyon.
Samtang nakapalit na usab ang Kapitolyo og 10, 000 ka anti-rabies vaccines nga giapod-apod na sa upat ka provincial ug 12 ka district hospitals sa Proibnsiya sa Sugbo.
Ang maong suplay igo na sa usa ka quarter o hangtud mahuman ang tuig.
Ang Kapitolyo mopalit sab og polyvalent anti-venom vaccines nga epektibo sa venom alang sa mapaakan og bitin.
"This is especially helpful to Cebu's tourism industry, particularly in adventure tourism, where guests explore Cebu's natural wonders and may be exposed to snake bites", dugang ni Catalan. BDB BANAT NEWS
- Latest
