“Adopt-a-River” program ipatuman sa siyudad

CEBU, Philippines — Gisugdan na sa Kagamhanan sa Dakbayan sa Sugbo ang pagbutang og floating rubber river booms ang mga sapa sa Barangay Labangon, Bulacao, Pahina Central, Inayawan ug Bacayan.

Usa kini sa hiniusang inisyatibo sa kagamhanan uban sa Cebu Chamber of Commerce and Industry (CCCI), RiverRecycle,ug usa ka French environmental firm aron mas mapadali ang pagpanglimpyo sa mga sapa ug dili molahus ang mga hugaw ilabi na ang mga plastik nga basura paingon sa dagat.

Ang mga gibutang nga floating barriers maoy mosagang ug motapok sa mga basura aron hingpit nga makab-ot ang tinguha nga mapakunhod ang polusyon sa dagat ug mapauswag ang kalidad sa tubig sa mga suba sa dakbayan.

Gipasabot ni Cebu City Mayor Nestor Archival nga ang proyekto usa ka doble nga estratehiya nga naglangkob sa dinaliang pagpanglimpyo ug malungtaron nga solusyon aron nga mapanalipdan ang kalikupan sama sa pagkolekta sa basura sa mga kanal, suba, ug estero ug hugot nga pagpatuman sa mga ordinansa kabahin sa waste management.

Plano sa mayor nga ipadayon ang proyekto sa tanang sapa sa syudad sa umaabot nga mga bulan ug aron masiguro nga mapadayon ang nasugdan nga proyekto, giawhag sa mayor ang nagkadaiyang hugpong nga nagprotehir sa kalikupan lakip na ang mga barangay organization nga mosalmot sa “Adopt-a-River” program.

Ang mga makolekta nga mga basura gikan sa mga floating rubber river booms himoon kining mga gamit sa balay ug buhatan aron nga mapahimuslan kini pagbalik. 

Malaumon ang mayor nga pinaagi sa maong kalihokan, mabalik ang kinabuhi ug katahum sa mga suba sa dakbayan. (BANAT NEWS)