P500,000 na ang reward

CEBU, Philippines — Misaka na sa P500,000 ang reward money alang sa makahatag og impormasyon sa nahimutangan sa mga suspek nga mipusil patay kang Police Captain Joel Deiparine samtang nag-surveillance sa Sitio Balaw, Barangay Sudlon 2, Siyudad sa Sugbo niadtong Sabado, Oktubre 25, 2025.

Matud pa ang P300,000 gikan sa mga concerned stakeholders nga wala na nagpahingan. Kahinumduman nga una ng nihatag og P100,000 nga reward money ang PRO-7 ug gidugangan og P100,000 ni Cebu City Mayor Nestor Archival.

Ang Criminal Investigation and Detection Group (CIDG) nasubo pag-ayo sa nahitabo kang Police Captain Deiparine, Assistant Chief, Intelligence Section sa CIDG Regional Field Unit-7.

Nakaabot ang report kang Police Major General Robert AA Morico II, Acting Director sa CIDG nga alas 6 niadtong Oktubre 25, 2025, si Police Captain Joel Deiparine ug Police Executive Master Sergeant Archel Tero, parehong personnel sa CIDG Regional Field Unit-7, nagpahigayon og casing ug surveillance operations batok sa gun-for-hire suspects diin nag-motorsiklo sila.  Nasigpatan nila ang sakyanan sa mga suspek ug gisundan hangtod nga nihunong ang suspek nga silang Jun Manto, ug Renante Manto, ug usa ka kauban nilang wa pa mailhi ug gipaarakan ang mga biktima gamit ang long firearm.

Nakaangkon og samad pinusilan sa nagkadaiyang parte sa lawas si Deiparine nga maoy hinungdan iyang kamatayon, samtang si Tero nakaangkon og minor injuries.  Gihatagan sab og Medalya ng Kadakilaan (PNP Heroism Medal) (Posthumous) si Deiparine tungod sa kaisog ug bayanihong paghimo sa gipanumpaan nga trabaho.  Gipasalig sa CIDG nga dili sila mohunong hangtud dili masikop ang mga suspek. IBM  BANAT NEWS