Nanglungkab nakonsensiya

CEBU, Philippines — Nitahan ang milungkab sa usa ka balay sa usa ka subdivision sa Barangay Tubod, Minglanilla tungod kay nakonsensiya.

Ang suspetsado giila nga si Jessie James Jumao-as, 24-anyos, usa ka construction worker nga residente sa Consolacion, Cebu, nga adunay live-in partner ug usa ka anak.

Siya nasikop sa Minglanilla Municipal Police Station human mitahan kang Lapu-Lapu City Congressman Junard “Ahong” Chan niadtong Lunes, Oktubre 27. Sumala sa unang report, kaniadtong Oktubre 23, gipugos ni Jumao-as paglungkab sa plywood nga giali sa lungag sa air conditioner sa balay nga gipanag-iya sa usa ka administrador sa usa ka rehabilitation center sa Minglanilla.  Nakuha ni Jumao-as ang sling bag nga dunay P120,000 nga kwarta, lain-laing mga identification card, credit ug ATM card, ug mga tambal.

Ang suspetsado miangkon sa krimen ug mitug-an nga nabuhat niya kini tungod sa iyang pagka-adik sa ilegal nga drugas ug online gambling. Apan iyang gihimakak nga P120,000 ang sulod sa bag kondili P50,000 ra.

Ang P10,000 iyang gipalit og 13 ka sachet sa shabu; P5,000 iyang gihatag sa iyang amahan; ug ang nahibilin, iyang gipusta sa “scatter.” Matud niya nakonsensiya maong nitahan siya kang Congressman Junard “Ahong” Chan nga maoy mipasa niya kagahapon sa Minglanilla Municipal Police Station.

Si PLt. Col. Maria Theresa Macatangay, officer-in-charge sa maong istasyon, nanghinaut sa publiko nga magmatngon ug magpanalipod sa ilang mga balay, ilabi na karon nga panahon sa “ber” months nga sagad nga panahon sa pagpanglungkab ug pagpangawat. IBM BANAT NEWS