Graduate sa CIT-U top 1 sa ECT Licensure Exam

CEBU, Philippines —  Usa ka graduate gikan sa Cebu Institute of Technology–University (CIT-U) ang nakakuha sa unang pwesto sa October 2025 Electronics Technicians Licensure Examination, base sa resulta nga gipagawas sa Professional Regulation Commission (PRC).

Si Ace Bryle Arcello Illustrisimo, 23 anyos, ang nahimutang sa Top 1 nga nakakuha og 92 porsyento sa nasudnong eksaminasyon. Matod niya, siya “truly grateful and overjoyed,” tungod kay nakabalo siyang nakahatag siya og dungog ug pasalamat sa mga tawo nga misuporta ug mituo kaniya sa tibuok panahon sa iyang review.

Sumala ni Illustrisimo, anaa siya sa ilang sala sa dihang migawas ang resulta. Sige siya’g refresh sa PRC Facebook page samtang naghulat nga mogawas ang listahan sa mga topnotchers. Ang iyang higala maoy unang nakakita sa resulta ug mao’y mipadala og litrato sa ilang group chat. Human niini, iyang gisultihan dayon ang iyang ginikanan nga naghulat usab kauban niya.

Aron maandam, nagsunod siya og istriktong adlaw-adlaw nga schedule sa pagtuon, nagtuon sulod sa walo ka oras matag adlaw, nagbasa og reference books, ug nagsulbad og multiple-choice questions aron mapalig-on ang pagsabot sa mga konsepto.

Ang labing lisod nga bahin sa iyang preparasyon mao ang kakulang sa oras. Ang orihinal nga plano mao unta nga kuhaon niya ang Electronics Engineering (ECE) ug Electronics Technicians (ECT) Licensure Exams sa Abril 2026. Apan, gisugyotan siya sa ilang department chairman nga kuhaon una ang ECT exam karong Oktubre, nga nagbilin kaniya og usa lang ka bulan para mag-andam.

Mitug-an si Illustrisimo nga naglaum siya nga mahimong topnotcher tungod kay kabalo siyang andam siya ug naghatag sa iyang tanang makaya atol sa review.

Sa pag-atubang sa pressure, iyang gipokus ang kaugalingon sa mga butang nga iyang makontrol ug gidawat nga normal ra ang stress isip kabahin sa proseso.

“My biggest inspiration has always been my family — silang Mama Nanet, Papa AceBoy, ug akong mga igsuon. We may not be so privileged, but I think I’m very privileged to have them. Knowing nga naay mga tao nga pwede nimo maduolan kung ma-overwhelm na ka sa review, ug naa pud pirmi mo suporta nimo no matter what, means a lot” matod ni Illustrisimo

Gipasidungog usab ni Illustrisimo ang dako nga papel sa CIT-U sa iyang kalampusan, ilabi na ang ECE Department nga gipangulohan ni Engr. Susana Tan, nga maoy misugyot kaniya nga motake sa exam.

Giila usab niya si Engr. Allan R. Pangan, Top 1 sa April 2025 ECT Licensure Exam, tungod sa pagtabang ug paghatag kaniya og mga libro ug reading materials nga gigamit niya sa review.

Human makuha ang unang pwesto, plano ni Illustrisimo nga magpahulay og usa ka semana ug dayon magpadayon sa pagpangandam alang sa Electronics Engineering Licensure Exam sa Abril 2026. (BANAT NEWS)